إلى روح الشهيدة شيرين ابو عاقله/ شربل بعيني


بأيّا وقاحه وغدر قتلوكي   

يا نجمة القدس.. وما عرفوكي

إنّك شيرين الحامله فلسطين   

بقلبك.. بـ صوت مدوزن ملوكي

افتكروا إذا بتموت الحساسين   

بيقضوا ع أشرف ناس سمعوكي

ولمّن عليكي قوّصوا مجانين    

برصاص جوّا الرأس صابوكي

ركعتي تبوسي تراب بـ جنّين   

غفيتي تحت شجره وما وعّوكي

جن الشعب.. وتجمهروا ملايين  

متل العروس بحب رفعوكي

برموا المخيّم.. سكّروا دكاكين   

وبالعطر.. بالأزهار رشّوكي

ركعوا وصلّوا ورددوا الآمين  

ومتل الوشم ع الصدر طبعوكي

صرتي شهيده بين قديسين   

ونار الجحيم لناس ظلموكي

بأسف على عربان ملهيين   

خوّان.. كيف بدّن ينصروكي؟

باعوا القدس مع شعبها من سنين   

وبتلاتعش أيار باعوكي

ووقت الجنازه تجمّعوا شياطين   

منعوا العلم.. ضربوا اللي حملوكي

معقول حرمه تخوّف ملاعين   

وإنتي بقلب تابوت خافوكي

لا تزعلي.. ما بيعرفوا مساكين  

بدل العلم بالدمع لفّوكي

المتلك صعب تا يموت يا شيرين 

والقدس أمك.. والشعب بوكي

شربل بعيني


ليست هناك تعليقات:

إرسال تعليق