قصيدة الشاعر الياس خليل في حفل توزيع جائزة شربل بعيني في قصر الأونيسكو ببيروت

ـ1ـ

ما بين قلبي ونظرة عيوني

شفت الوطن بالبال كينوني

كمشت الشمس وضربتها بهالأرض

وقلتلها كوني بأرض لبنان

فوق الوطن ما منقبل تكوني

ـ2ـ

دكتور عصام حداد بسيوفك

حورب وحيي من السما ضيوفك

رفرف عا أشعارك وحي جبران

وتكريمنا تكمّل بمعروفك

ميت وطيّب عا العلم سهران

ونحنا بعين العقل منشوفك

وبالأبجديه معهدك عمران

من هيك كرمالك رجع قدموس

يرصع بيوت الشعر بحروفك

ـ3ـ

حفله بهيه بتشبه جنينه

فيها بهيه مرجحه العينه

ولولا أنا عشت العمر عمرين

رح ضل عاجز عن وفا ديني

تملّك يا دكتوره شعوري تنين

الست البهيه وشربل بعيني

بتتنقلو بين القلب والعين 

إنتي بقلبي شربل بقلبي 

إنتي بعيني شربل بعيني

ـ4ـ

سعاده وخوري بأجمل الردات

وبصوت شاعر دربهن دربي

وجورج بو أنطون بالحفلات

أطيب نقيب ومطرحو بقربي

وأندراوس زينة الستات

إعلامها علم وذكا ودربه

ودلال دل الفن عا السهرات

بينو وبين قلوبنا قربه

والأبجديه معهد الكلمات

صدر الجهاله بتطعنو بحربه

وطلة بهيه شمخة الأرزات

وشربل بعيني بروعة الأبيات

عا صفحة الغربه ظهر بالذات

ورجّع وطن كامل من الغربه

**

قصيدة شربل بعيني للشعراء جورج ابو انطون والياس خليل وانطوان سعادة

لمّا الشعر بيطلّ ع الغربه
بْيِرْقُص لَوَحْدو بالصّدر قلبي
وبتصير دقّاتو
تِحْكي حْكاياتو
وتمحي وجع متكدّس بدربي
لولا الزَّجلْ ما بِقْيِت الأرزه
بالميجانا والأوف معتزه
هوّي اللي وحّد بالفرح شعبي
ــ2ـ
ولمّا النقابه بتفرُش جْناحا
ع الشّعر.. ع الشعّار.. ع الكلمه
بتغمر دني.. بْتزيد أرباحا
بْتِلْغي العتم تا تْشرقط النجمه
ويا جورج بو انطون.. مفتاحا
بيفتح بواب قصور
انبنيت ع شط بحور
بإيدين شعلة نور
تركت وطنها وفضيت الساحه
ـ3ـ
انت الأمل.. خلّي الأمل فرحان
يحكي حْكاية شعب بالهجران
نحنا رفاقك.. يا نقيب الشعر
خلّي النقابه توحّد الأوطان
الشعّار، وين ما كان، باقة زهر
بتموت زهره قلبها عطشان
جنح الوطن لو ضمّ جنح الهجر
بْجِنْحَيْن فيكُن تِرْفعوا لُبنان
ـ4ـ
ويا الياس خليل لْطَلتك رح قول
متل الكذب.. شفت الشعر ماشي
حامل جسم إنسان مش معقول
ع ورد خدّو غطّت فراشه
وأنت يا انطون.. يا سعاده
يا الْمسرحك بيزين بلادي
الياس لمن رافقك فهمان
انك وفي ما بتغدر بإنسان
بلبنان.. هالباقي بعد لبنان
دْخَلْت السياسه.. زِدْت أمجادي
زِنْتْ الرئاسه.. تكسّر الميزان
وصارتْ الكرسي بيت قرّادي
ـ5ـ
ويا بَهيّه الشعر لمّن طلّ
شاف الشمس.. قال: الشمس حِرْمِه
بتفتح ايديها تا تْحُوش الكل
بترْجَع ايديها حاضنه الكلمه
وتا فسِّر الكلمه اللي بْجِلاَّ
الكلمه لْ حضنتي إسمها.. أللـه
**

محبة أعضاء جوقة المسرح الزجلية لشربل بعيني

محبة الياس خليل لشربل بعيني

يا شربل بعيني إنت قربي

متل قرب الروح للإنسان

عندك وطن عايش بهالغربه

وعندك.. بِـ عينيي شفت لبنان

رباعية الشاعر الياس خليل في سيارة شربل بعيني

دعا الشاعر شربل بعيني الشاعرين الياس خليل وعصام ملكي لتناول طعام الغداء قي أحد المطاعم القريبة، فلما همّ الشاعر خليل بالركوب خلف السائق رفض عصام ذلك وأصرّ  عليه ان يجلس قربي على المقعد الأمامي، وإلا لن يركب السيارة، وما أن حقق الشاعر الياس خليل طلبه حتى ارتجل هذه الرباعية الرائعة:

يا عصام.. الشعر منّك بسمعو

وشربل بعيني.. متل عيني مطلعو

إنت الجبل قاعد ورايي يا عصام

حتّى السهل قدّام منّك نقشعو