حفلة زجلية بين الشاعرين لطيف مخايل وشربل بعيني ألهبتها صورة

نشرت الدكتورة بهية ابو حمد الصورة المرفقة، والتي تجمعني معها في حفل جمع التبرعات للجيش اللبناني، فما كان من الشاعر لطيف مخايل إلا أن وجّه تحية شعرية للدكتورة بهية وتجاهلني كلياً، فكان هذا الحوار الزجلي بيننا:

لطيف:

لبسِتْ البدله واعلنتْ "بَاتي" الكفاح

ونحنا فرحْنا بعَودة ليالي الملاح

ولمّا بنظرات العيون تصّوبي

بنرفع العشره قبل ما تسلّي السلاح

شربل:

واقف أنا حد البهاء ومختفي

ما شافني شاعر باخلاقو وفي

تاري البهيه بتسرق عيون البشر

وبتلبسك يا صاحبي القبع الخفي

بهية:

مين اللي قال اليوم شربل مختفي

وشعر القداسه من حروفك مكتفي

عيون البشر من نورك بتاخد نصيب

تا تلبسك قبع المجد.. تا تحتفي

لطيف:

الشعّار برعاية بهيه بيشكروا

وعطفها من الصعب نحنا ننكروا

مُشْ بس بنسى شربل بعَيني انا

اسمي نسيتو وما عدت اتذّكرو

شربل:

خرفان صاير.. والخرف ما بتنكرو

واسمي أنا من الصعب انك تذكرو

شربل بعيني يا لطيف بغربتو

متل الجبل.. بتقول يا ما اكبرو

شربل:

قريت شعرك يا بهيه عن حذر

ما رضيت ردد اسم شاعر منذكر

بحبو أنا.. لكن عدوي بالزجل

هيك الزجل بيكون تا يرضي البشر

لطيف:

عَ كلمة الخرفان بصرخ يا لطيف

لطّف يا شربل جوّنا وداري لطيف

اسمك واسمي وكل اسم بينحذف

لمّا تطل نعومة الجنس اللطيف

شربل:

كرمال عينك يا بهيه مع لطيف

رح قول شعر مدهب وشكلو ظريف

من بعد خبرة عمر يا ست البهاء

من الصعب اني زعل الجنس اللطيف

لطيف:

بجيرة بهيه وشربل استحلَيت عيش

عيشه هنيّه لا ضجيج ولا خشيش

زعّل يا شربل صاحبك بيسامحَك

زعّل مرا بتنام برّا ع الحشيش

شربل:

ما بزعلك وحياة عينك بغمرك

بعطف الاخوه وبالمحبه بزنرك

لكن أنا خايف عليك من الهوى

توقع شي وقعه يا لطيف ونخسرك