كمشة مراجيح/ أنطوان قزّي

رئيس تحرير جريدة التلغراف ـ سيدني

ـ1ـ
نيّال يللي ربّتو إمّو
وزر الورد بعد ما شمّو
ولمّا كبر غافل النسمات
وصار الشعر ينشال من دمّو
ـ2ـ
كلمات تنده عالمدى وتصيح
وشموع من درب القمر بتزيح
وشاعر بكفّو كمشة مراجيح
خلّى الحبايب هون يلتمّوا
ـ3ـ
حلمت السما نجمتين زغار
وشربل بعيني آخدُن مشوار
نجمه هديتو شالها زنّار
والتانيه تفتّش على تمّو
ـ4ـ
متل الصبيّه من الحلا جايي
مقابيلها نجوم السما مرايه
شافها.. وصاروا سوا حكايه
ونام القمر زعلان من سمّو
ـ5ـ
ومحمد الباشا شاف العناقيد
بأبيات شربل.. تسكب مواعيد
وشفاف تعصر عطر خدّو جديد
تقلّو يا باشا قرّب وضمّو
ـ6ـ
حيران ماشي والزهر مشلوح
وشاعر من شوك الورد مجروح
لما صرخ: يا رب وين بروح
قال الصدى: من هون يا عمّو
صدى لبنان، العدد 654، 11 تموز 1989
**

ليست هناك تعليقات:

إرسال تعليق