شربل بعيني زينة الشعّار/ عصام ملكي

كلمات محبة

وين القلوب الواعيه وويني

ما عاد فيهن رجحت العينه

جياب الصداقه أعلنوا الافلاس

وكبر الدني عم يزغر بعيني

ودار الجدل عن قيمة الإحساس

ما بين بيني وبين ما بيني

حسّبت بعيوني جميع الناس

ومن بعد ما بقبشت ليل نهار

ما لقيت إلاّ شربل بعيني

صدى لبنان، العدد 776، 6/2/1990

**

ألله ونقطة زيت

بأللـه وبنقطة زيت شو جمّع فنون

شاعر بعيني.. صار ببّو العينتين

نحنا طلعنا فرد عينه بالعيون

وشربل بعين الشعر طالع عينتين

سيدني 1989

**

زينة الشعّار

شربل بعيني.. زينة الشعّار

بإيدو الدني منعدّها كمشه

بقلب "الصدى" عندو قلم جرّار

وهللي وقف "بستوب" عم يمشي

سيدني 1989

**

طلة بعيني

كل الزهور بتفرح ان طلّ الندى

وبطلّة الحلوين قلبي بينهدى

وبطلّة "بعيني" عم تطير الهموم

وطلّة "أبو ملحم" عم بتعمل صدى

سيدني 1989

**

مشغول

بريت صابيعي وخطّك المشغول

باقي عَ حالو.. والفكر مشغول

يمكن عم بتحكي مع الحلوين

هللي إلك قالوا ظريف الطول

مع مين عم تحكي كنت مع مين

البنت الفلانه أيش عم بتقول؟

حاجي عّ ورقه تسجّل عناوين

وعَ كل ظرف تحطّ ورقة بول

تزوّج بقى.. حاجي قليل الدين

عمر العزوبيّه حرام يطول

نحنا بدنيي ملوّنه تلوين

حلّك بقى تنقّي يا شربل لون

تا نقول منّو عالمك مشغول

سيدني 1993

**

تجديد

شربل بعيني عاشق التجديد

بيقول وزن الشعر منّو أْساس

ونحنا انجبرنا من طريقو نحيد

تا نشوف وين الدرّ والإلماس

سيدني 1990

**

طلّة عيد

شربل علينا طلّ طلّة عيد

عنّ عْلى بالو بشطّنا يرسي

قالت الأهلا: كيفك من بعيد

والمرحبا جابت إلو كرسي

صوت المغترب، العدد 1008، 22/12/1988

**

شربل والباشا

مين قال الفن تلاشى

صاير أحسن من ما كان

محمد زهير الباشا

عن شربل عامل ديوان

الكلمه زخمي بقماشا

فيها مجبول الإيمان

الفكره عطيناها معاشا

علاّ فيها وشاف الربّ

وقلّو تفضّل ع لبنان

صوت المغترب، العدد 1008، 22/12/1988

**

راعي القطيع

شربل بشعرو انعدّ راعي للقطيع

شاعر قدير وعبقري وشعرو فظيع

مجالو مجال النسر بالجوّ الوسيع

ومتلي بيغنّي شعر للخصر الرفيع

شربل بعيني كان من مدّة زمان

واليوم شربل صار بعيون الجميع

صوت المغترب، العدد 1008، 22/12/1988

**

ديوان شربل

عَ لسان ملكي وصلت الأخبار

وداق السمع جمله ورا جمله

ديوان شربل بالمكاتب صار

روحوا اشتروا بينباع بالجمله

صدى لبنان، العدد 674، 28/11/1989

**

شربل بعينينا

علقت يا شربل بينك وبيني

وطلعت الصرخه بقلب دينينا

هلّلي بيقولوا: شربل بعيني

عم قلّهم: شربل بعينينا

صدى لبنان، العدد 647، 23/5/1989

**

دعسة ناقصة

قيموا القيامه.. وزقّفوا ودقّوا النفير

وعَ الهول جيبوا اليوم أحلى راقصه

"الخوري" بدعسه ناقصه بيكبر كتير

وشربل نقص كيلو بدعسه ناقصه

صدى لبنان، العدد 647، 23/5/1989

**

صيبة عين

قلت لفؤاد: الجوّ بدو يطيب

طالع عَ بالي صيبك بعيني

قلّلي: بعينك مستحيل تصيب

ما زال فيها شربل بعيني

صوت المغترب، العدد 1055، 16/11/1989

**

بالفكر بيضلّ

لشربل قلت: يمكن نجي.. علّق

عَ كلمتي، وقللي: تعوا هلّق

عَ طول قلبو بيفتحو للضيف

تزوّج "يا أهلا" ولا تجوا "مطلّق"

فصل الشتي عندو عَ وزن الصيف

من المستحيل الرعد يتخلّق

والجو عندو للبسط والكيف

الـ بيغط عندو بينسمى محلّق

يا حيف ع الما قدّرو يا حيف

من كل كلمه صادقه تملّق

نحنا المقام منعملو للطيف

وما زال شربل بالفكر بيضل

بشخصيتو منضلّ نتعلّق

صدى لبنان، العدد 685، 13/3/1990

**