إلى روح عمتي جورجيت بعيني

ـ1ـ

يا عمتي جورجيت شو بقلّك

مهما بعدتي.. بقلبنا محلّك

سركيس، باخوس، بولس وبطرس 

إخوه.. اشتاقوا كتير لمطلّك

خرستين ستّي عيلتا بتحرس

ودّت أبوكي ع السما يدلّك

ومادلين حُبّا زهور عم تغرس

وكرمه الحنونه بتعشقك كلّك

وبطرس، رفيق الدرب، عم يدرس 

كيف بدّو يزيّنك بالحُبّ

وإنتي حنان وحبّ ع حلّك

ـ2ـ

قلوبنا بتبكي على غيابك

بملبون وسيدني كتار أحبابك

العمه.. ع طول منعتبرها أم 

نحنا ولادك.. وسّعي بوابك

خوسيهْ.. يللي سنين فيكي اهتمّ 

للعيد شفتو محضّر تيابك

العمّه.. ع طول عيالها بتلم

لمّت عيالك دمعة مصابك

الدم البعيني هون.. أشرف دم 

لوّن بحبّو كمشة ترابك

ـ3ـ

يا عمتي جورجيت باقي هون

عمّه وحيده منعبدا عباده

راحيل.. قوليلو لإله الكون

يطوّل بـ عمرا شوي بزياده

قلبا احترق ع البنت من شهرين

واليوم.. موتك نار بالعينين

بيكفي حزن.. بـ جاه هالعيدين

خصوصي ميلاد السيّد الفادي

شربل بعيني