روميو عويس وطوني رزق وشربل بعيني وعصفورة فؤاد نعمان الخوري

 كثيرون هم الذين قرأوا قصة "بسترينة" الشاعر فؤاد نعمان الخوري التي طلبها مني بشكل عصفورة جميلة شرط أن نتقاسمها معاً، فؤاد رضي بالقسمة (راجعوا القصة هنا)، وأقفل باب بيته وراح يتنعّم بما رزقه الله: الطابق الفوقاني، ولكن الشاعر روميو عويس دخل على الخط وراح يطالب بحصّته من "البسترينة" بعد أن ضاعت بين شاعرين، فقال:

لا تختلفو يا رفاقي

الاحلا منكم ما بلاقي

عطوني ياها تحت وفوق

وانا مكفّل بالباقي

فأجبته:

يا روميو خليك بعيد 

لا تنزع طلّة هالعيد 

قسمنا العصفوره من زمان 

ومش رح نقسمها من جديد

فإذا به يكتب على صفحته بالفايس بوك ما يلي:

ونعود الى قصة الهدية بين الاستـاذ المربي الشاعر شربل بعيني صاحب تلفزيون وراديو "الغربة" والشاعر العزيز الاستاذ فؤاد نعمان الخوري:

قلت بصالح رفقاتي

ببعضن، لا يصير شماتي

تاري المصلح لو تلتين

القتلة.. زعلو الفريقين

بدل .. تسلم ديّاتي

**

حسبت بايام الاعياد

اماتي كبيرة اعمل

زعل وما جاوب فؤاد

وبردّو منرفز شربل

**

فردّ عليه الشاعر طوني رزق قائلاً:

 يا مصلح بين التنتين

شكار ربك منك متلي

كلة من القتلي تلتين

ومش اكل كل القتلي

طوني بحسّه الشاعري أدرك أننا لن نتخلّى، لا أنا ولا فؤاد، عن حصتنا لروميو، وكأنه يعلم مسبقاً ما سوف أقول:

يا روميو منّي زعلان 

لكن بوقت الشدّه

تركنالك كل النسوان

استكترت علينا وحده

فأجاب روميو:

 يا شربل عني لا تقول

زوقي صاير بالمرّه

اللي عندو مطعم عا طول

بيستحلي يفطر برّا

فوجدت أن الوقت قد حان لأقدّم لصديقي العزيز هذه النصيحة التي تساوي ألف جمل:

كلمه كتبها بكتابك

تا ما تخسر أصحابك

يا روميو لمّا بتفطر 

لازم تفطر ع حسابك

ولأن روميو يخاف على أصدقائه خوفه على نفسه أنهى الحكاية كما يلي:

يا خيي انت وفؤاد

تقاتلتو عالهديي

قلت المشكل بالاعياد

ما بيستاهل يا خيي

تحمست وهيكي معتاد

حل القصّه حبّيي

قلت بلا نقار ولا عناد

الحلوه خلّوها عليي

وطلعت الفشّه فيي

وأخيراً لام صديقه طوني رزق لأنه تأخّر بتقديم النصيحة له:

ويا طوني رزق الحبّوب

كنت من الاوّل قلّي

ما تتركني آكل جوب

تا النّصيحه توصلّي

لا يا روميو.. لن نطعمك "جوب" بل سنمطرك بالقبلات لأنك أهديت قراء الغربة، أنت وفؤاد نعمان الخوري وطوني رزق، أبياتاً زجلية مرحة تزيد عطلة الأعياد بهجة.. فألف شكر لكم جميعاً.