دمعة شربل بعيني على ابنة عمته ماري بعيني

لا تزعلوا.. لو فارق الدنيي مَلاك
مْلاك السّما بيروح وبيرجع

المؤمن بـ ربّو.. صعب يطويه الهلاك

بتضل روحو بالسّما تلمَع

من بعيد جايي.. ودمعتي قنطار

تا ودّع اللي حارقَه قلبي

زهره.. إذا بتخبّر الأزهار

انوجدت لَ عرسا بس.. يا ربّي

هيك العرس بيكون!؟ مش معقول

نطرنا الفرح.. مين حوّلو لْمأتم

ماري بعيني الـ سوسحت العقول

صفّى المسيح بطلّتا يحلم

ع اسم مريم.. سمّتا الام الحنون

راحيل عم تبكي عروستها

وطلّت العدرا.. الدمع جُوّات العيون

ع سميّتا.. ونخّت تا باستها

بِكْيِت عْليها أرزة بْلادي

وبِكْيِت الجاره.. ودقّت جراسا

هاك الْكنيسه الـ شبعتْ عباده

بِـ مجدليا.. منحني راسا

 عشنا سوا متل الأخت والخي

ومحروم صوت الأخت يا دلّي

مهما انطفى من العمر صيتا حي

وكرمال عينا عْيال بتصلّي

هنيّال قلبا الكل حبّوها

وما في قلب ما استقبلا بقلبو

ضبّت شنطها وراحت لبُوها

ترجّت يسوع يعيّشا بْقربو

من بعد موتِك.. يا عروس زغيّرَه

صارت حياة عيالنا متغيَّرَه

القبر اللي إنتي فيه رح يبقى مزار

مهما برمنا بهالدني.. عيالك كْتار

ودروبنا رح تنتهي بهالمقبرَه

شربل بعيني

30/7/2013