هكذا رثى شربل بعيني صديقه الشاعر الراحل عصام ملكي في ذكراه السنوية الاولى

ـ1ـ

اليوم بدّن يسمعوني الناس     

يا إبن ملكي.. وعدّ ألطافك

وميزان شعرك للوزن مقياس   

ما في حدا بالوزن ما خافك

وع قد ما وجودك حلو وحساس   

صارت النكته ترافق شفافك

وما نسيت "ساره" شمعة القداس   

بنتك حلم عايش بأطيافك

حبيت إنو تزورها وتنباس    

بأعلى سما.. وتغل بلحافك

بعدو سْريرا بالفكر وسواس    

يا ما حلفت برحمتا ومحزون

ووصيت بس تموت حدّا تكون   

موت الطفوله كسّر كتافك

ـ2ـ

تارك "يولندا" رفيقة الأشعار   

ليش حتّى قسيت ع حبّك؟

أجمل قصيده تركتها بالدار  

أم البنات حفرتها بقلبك

من بلاد خلف البحر جنحا طار   

سُهاد طلّت.. ليش تا ملبّك

قوم لاقيا.. دمعاتها قنطار    

 بناتك يا ملكي.. دربهن دربك

يا عصام الشعر.. شو ما صار     

بتضل عايش موطنك كتبك

وبكروم بشمزين في أزهار    

انزرعت إلك.. عم يسقيا ربّك

موتك ألم.. موتك أنين ونار  

 منكبر اذا منقول: منحبّك

شفت الدمع نازل بسيدني جرار   

 فكّرت إنو الشعب عم يبكيك

تاريك عم تبكي على شعبك

ـ3ـ

أيّا عرق رح تنتج الكركه   

وتمرمر العنقود ع غيابك

ما سكرت مرّه.. سكرت الضحكه   

ودوّبت كل الحب بشرابك

ويا ما وقعت وقعات.. ما تشكي   

خاف الوجع من قوّة مصابك

وأيّا قصيده قادره تحكي    

وجنّت وقت ما تشلّع كتابك

جوقات زارت بيتك الملكي   

وما تسكّر بوجّ البشر بابك

إسمك عصام.. وعيلتك ملكي   

خالد إنتْ بعقول غيّابك

وعايش ع طول بقلب احبابك

راحيل قديسه/ عصام ملكي

الى روح الأم الحنونة راحيل بعيني ـ أم كلارك

ـ1ـ

كلما النهايه نقوقز عليها

آخاتنا منقشع حواليها

عا عمتو شربل دموعو دم

بدرب الحياة معلمه جريها

ـ2ـ

البتكون متلا كل ساعه بقول 

عنها الحكي بيضل شامط طول

بعين العرفها مليح قديسه

وتا تكون منها هيك مش معقول

ـ3ـ

سمعت الخبر وقطعت تنفيسي

وحق السكوت دفعت من كيسي

اللي بيعرفوها بالحياة كتار

ما في حدا ما قال قديسه

ـ4ـ

مش بس شربل حاقد وزعلان

العيله عليها دموعها طوفان

بقدّم تعازي بموقع الغربه

البيعيش فيها موطني لبنان

**

عصام ملكي

الشاعر عصام ملكي يهنىء صديقه شربل بعيني بعيد ميلاده

يا شربل بعيني من بلادك

انتْ أرزه وشامخه عمادك

ألله عطاك بهالدني وزادك

ومع كل مخلص منقسم زادك

قلنا عا عشره شباط من يومين

عا تمانيه وستين يخزي العين

عنا بسيدني صار ميلادين

عيد المسيح وعيد ميلادك

عصام ملكي

اهلا عصام ملكي النائمة

كنت أمر بالقرب من منزل الشاعر عصام ملكي في منطقة "كامبلتاون"، فقررت أن أزوره على حين غرة، أي بدون موعد، أولاً، لأطمئن عليه بعد العملية التي أجراها لإحدى عينيه، وثانياً، كي اربح منه ردة ارتجالية مفرحة.

صعدت درج البيت، ونظرت من النافذة، فوجدته نائماً، أو هكذا تخيلته. نقرت على الزجاج نقرتين، فإذا به يهب واقفاً، وهو يقول:

كونك يا شربل من بني قومي

واليوم كنت محسّبو يومي

بدقات قلبي ما قدرت حاكيك

ولا قدرت هلّق قول: أهلا فيك

كانت "يا أهلا" فاقعه نومه

ألم أقل لكم انه كان نائماً. أطال الله بعمره، كي نظل نتنعم بأشعاره الجميلة.

ظروف تعبانين/ عصام ملكي

يا شربل بعيني تلف حدّي

لعند البلا أخلاق ما بعدي

بتشرين نحنا ومتلنا ملايين

قديش بدنا بهالدني نهدّي

نحنا عن اللي صار مسؤولين

عطينا اللي ما بيستاهلو مودّه

بقلّك أنا بلسان "بشمزين"

الفيها خلقت وبمنطق الجدي

صاحب إذا بتشيل من خمسين

قللي يا "ملكي" ما حدا قدّي

الهنّي بشر عا الأرض معروفين

بفرح عند ما بشوفهم حدّي

وبالرغم إنّي ما معي عناوين

سلامات للي سافرو بودّي

شالح ورايي "تنين وتمانين"

وما عرفت عمري صار هالقدّي

عندي رفاق تقمّصو شياطين

وما بيعرفو الشدّه من المدّه

ومن حيث عندي ظروف تعبانين

بدّي اللي متلك مستقيم وبس

أصحاب كيف ما كان ما بدّي

**

تحية من الشاعر عصام ملكي لمجلة الغربة

مجلة "الغربه" للقمر جاره

وللشعر هيي مرجع وسنده

وبالنثر شنّت عا الجهل غاره

وما في حرف ما عملتو جندي

بقلب الدني بتنعد دوّاره

وما بحب عنها ينقطع بندي

وينحط بيني وبينها حجاره

"الميّه" يا شربل عندك "براندي"

لاتقول بكرا بدك زياره

همومي بكتفي اليوم منسنده

بتم الزمن رح صير سيجاره

وطبه عا خردق نص عقلي طار 

داعس فرام ومحكمه عندي

باب السعاده/ عصام ملكي

يا شربل بعيني الحكي لمّو

نحنا بعصر يلعن أبو أمّو

بقلك أنا ولكلمتي توضيح

هللي بيسمك لازم تسمّو

باب السعاده ما الو مفاتيح

والحظ عندك ما فتح تمّو

ما بريد انو تروح شيح بريح

مفروض همّك بالدني تطمّو

الداعي إلك ما بينصب مراجيح

صحتك عا طول بتهمّو

نص الهوا منعاز منو مليح

تا تخلص من الأدويه والطبّ

لازم قبل ما تبلعو تشمّو

**
الرجاء قراءة التعليقات في اسفل الصفحة

يا ضايعين/ عصام ملكي

مرة جديدة يهديني الشاعر عصام ملكي إحدى قصائده الجميلة، وكأنني المحظوظ الوحيد، الذي حصل منه على أكثر من مئة قصيدة والحبل على الجرار.. فألف شكر له:

يا ضايعين بقلكم إنو

عا الواقع القانون منسنّو

هللي بكبر العقل إسمو كبير

مش هل بيقولو طاعن بسنو

مفروض ما تخلو العقول تطير

صوب الوعي غاراتكم شنّو

ها العمر اسمو دخنة سواكير

عطونا عبر وجراسكم رنّو

ولا تجبرونا إدن طرشا ندير

وقت البلا أسباب بتعنّو

من زمان قلت بأصدق التعبير

شربل بعيني جبلتو إخلاص

هنيال هللي بينعدي منّو

زوار نحنا/ عصام ملكي

قصيدة الشاعرعصام ملكي كما نشرتها
مجلة صوت الشاعر بلبنان

قصيدة جديدة يهديها الشاعر عصام ملكي لصديقه الشاعر شربل بعيني، تضاف الى المئات من قصائد محبته وتشجيعه لشربل

يا شربل بعيني.. الوحي أسرع

بوصفك لأنو كاسك منكرع

الظاهر انت مجبول بالإحساس

بوجه الأوادم بابك مشرع

إسمك ذكرتو وشربت كم كاس

وقلت لأنا تا بشعر إتبرع

زوار نحنا متل كل الناس

ومتل الشجر يبيسنا منفرع

ولما النهايه بتنتهي بقداس

وبيصير بدو العظم يتفرع

بتصير بزره روحنا وبتطير

صوب السما تا بغيرنا تزرع

تحية الشاعر عصام ملكي للفائزين بجائزة شربل بعيني عام 2017

ـ1ـ
نحنا لربّ الكاينه عبّاد
وأصحاب كلمه والحروف ولاد
باب الأدب والشعر عا عيني
مغلوق كان.. و"شربل بعيني"
المفتاح جابو من "عصام حدّاد"
ـ2ـ
حروف الهجا من جبيل.. من لبنان
أشكال عطيو للدني وألوان
اليوبيل فضّي متل ما قالو
الإخدو ضروري يقشع بحالو
بقصر الأونيسكو احتفالو كان
ـ3ـ
بقدّم تحيه لكلهم منّي
شم الهوا عا ذكرهم سنّي
من جهّة الإعلام في "ليليان"
و"شوقي دلال" المبدع الفنان
وأربع فطاحل بالشعر هنّي
ـ4ـ
"إبن السعاده" العبقري "أنطون"
و"الياس خليل" الما عليه دهون
فوق المنابر كل واحد سيد
و"روبير خوري" الرب عمرو يزيد
وريّس نقابه "جورج بو انطون"
ـ5ـ
العم ياخدو شهادات وقفو صفوف
"شربل بعيني" عامل المعروف
وست "البهيّه" بجوّها فرحنا
ومنها بعيده بجهدها نحنا
نجوم الضهر ساعة ما بدنا نشوف

أصحاب/ عصام ملكي

هذه آخر هدية شعرية من الشاعر عصام ملكي، تضاف الى أكثر من تسعين قصيدة جمعت كلها في كتاب طبع مرتين بعنوان "شربل بعيني زينة الشعار":

ـ1ـ

ضعت بأنا.. ومش منعرف ويني

تخمين صارت خمستي تنيني

بالعرض ما بقشع ولا بالطول

هللي ما وفيو بصحبتي ديني

المعقول عندن صار مش معقول

وبتضل تعلق بينن وبيني

وحياة ألله مية مره بقول

حطيت بعيوني كذا أصحاب

ما ضل إلا شربل بعيني

ـ2ـ
مكفّى يا شربل إنت وموفّى
عا سيرتك بالبرد بتدفّى
وهلّي حسبتو بدر صار هلال
بدّو عا ضهري يصرّف الأعمال
بأول لقا تا اضرب الأمثال
إسم الأفندي بقلّك بموال
وتا الوشوشه تمشي براحة بال
بخلّي الحرف هونيك يتحفّى
**

عصام ملكي

الى الوالدتين الغاليتين سارة ملكي وبترونله بعيني بمناسبة عيد الامهات

لم يشأ الشاعر عصام ملكي أن يهدي والدته المرحومة سارة هذه القصيدة لوحدها، لأنه يعتبر أمي بترونله كأمه تماماً، فشملها بمحبته في عيد الأمهات الواقع في 14 أيار، كما أنه رفض أن تنشر صورة والدته ان لم تتعانق صورة والدتي معها. وأن تكون القصيدة مهداة باسمه وباسمي الى الوالدتين الغاليتين. فهل من شعور أسمى من هذا الشعور. شيء واحد آلمني جداً، كونه تعرّف على والدتي ولم يسعفني الحظ كي ألتقي والدته وأغرف من حنانها. كل عيد أمهات وأنتما أحلى الامهات:

صدور الطبعة الثانية من كتاب عصام ملكي: شربل بعيني زينة الشعّار

صدرت الطبعة الثانية من كتاب "شربل بعيني زينة الشعار" الذي ألفها الشاعر المهجري المعروف عصام ملكي، ويحتوي على أكثر من 90 قصيدة، نشرت في 140 صفحة من القطع الوسط. ويثبت الشاعر ملكي بأشعاره هذه أن الشعراء اخوة، وأن بإمكانه أن يكتب عن جميع المواضيع، وإلا لما تمكن من أن يهدي صديقه ديوان شعر كامل.

وعندما وصلت نسخ الطبعة الثانية ليد "الملكي" وقرأ الكلمة المقدمة التي كتبها عنه شربل، حتى ارتجل هذه القصيدة وهو يقول: 

ـ حضّر حالك لديوان تاني:

هالكلمة اللي قلتها عملت صدى

يا شربل الفيك الخبر والمبتدا

مش ممكن تسخّر ضميرك بالحياة

البيقول منّك هيك عنّك ما اهتدى

كلامك بشرع المجتمع سكّر نبات

يا ريت عنا ناس منّك تنعدى

حضورك ع جلسة شعر اسمو مقبلات

بوقت العشا بيروح وبوقت الغدا

انت ابن الأم هالعندا صفات

وما كان عندا صوت صارخ بالودى

وقال المتل كلمه في إلها معطيات

وبالفعل كانت صوت ع طول المدى

وحتّى معك هاليوم إعمل واجبات

بعيون أمو القرد أحلى من الغزال

لكن عند أمك يا شربل ما حدا

**
الرجاء قراءة التعليقات تحت الخبر

عصام ملكي.. ملك الطيور

 إن أنسى لا أنسى تلك الزيارة التي قمت بها الى منطقة "كمبلتاون" حيث يسكن الشاعر الصديق عصام ملكي، وكانت الساعة تقارب الرابعة والنصف بعد الظهر، فإذا به يدعوني الى الجلوس في حديقة منزله، لأمتّع ناظريّ بمشهد قد لا أراه طوال عمري، وما هي إلا لحظات حتى أطلت أسراب الطيور الملونة، وراحت تغط على رأس وأكتاف الشاعر ملكي، وكأنها صديقته الوفية، في زمن قلّ به الأصدقاء.
عصام، بكرمه الزائد، راح يطعمها بيديه، وهي تأكل بفرح منقطع النظير، لا بل كانت تقبل خديه بين الحين والآخر، وكأنها تريد أن تقول له، بطريقتها الخاصة: شكراً.
وأذكر أنني صرخت بأعلى صوتي، بعد الانتهاء من هذا المهرجان العصفوري الرائع: أنت يا عصام ملك الطيور.
وما ان ناديته بملك الطيور حتى ارتجل ما يلي:
شعري شعاعو ولّع نجوم الفلك
وقلّي المعنى عندنا مستقبلك
وشربل بعيني قال منصوّت الك
ولمّا لقيت الكيف احساسي امتلك
العصفور قلّي بزقزقه شاعر عظيم
وهلّق علينا صرت يا ملكي ملك 
 شربل بعيني
**

أسلوب: آخر قصائد عصام ملكي المهداة لشربل بعيني

كنت أراجع ما كتيه عني الشاعر الكبير عصام ملكي من قصائد خلدني بها، فوجدتها قد ناهزت التسعين قصيدة، وها هو يهديني من قلبه العامر بالابداع هذه القصيدة الرائعة:
ماشي بزماني وما عرفت ويني
لو ما وقع عا الارض تلتيني
تا شوف حالي عامل مواعيد
مع كم أنا وما بينوفى ديني
منّو العتيق بحكم شرعي جديد
ما قلت مره واحدي تنيني
ألله خلقني للمحبه سيد
وما في حواجز بينها وبيني
بقول بصراحه والكلام بعيد
بقلبي عشر أصحاب يا عيني
وبعين عندي للغمز أسلوب
وبعين عندي شربل بعيني
**
الرجاء قراءة التعليقات

الى الاعلامي أكرم المغوّش/ عصام ملكي

لقراءة الكتاب الكترونياً
بهذه القصيدة الشروقية الرائعة استقبل الشاعر عصام ملكي كتاب الاعلامي أكرم برجس المغوّش "شربل بعيني ترنيمة حب" 180 صفحة:
أكرم مغوّش بطل منّو الفزع هربان
صفّ المحبّه معو عا طول منعيدو
معروف انّو وفي وبسورْيا ولبنان
عنّو بيقولو بطل من طلتو حيدو
كتابو عا شربل إجا بعواطفو مليان
عا اللي ما عندو وفا بيسحب بواريدو
مكتوب قولو انقرا من طلّة العنوان
ان قال بعطي صور عم يطلع بايدو
اكرم مغوّش وفي كرّم بني الانسان
عاطيه ألله وعي وكل يوم بيزيدو
عصام ملكي
الرجاء قراءة التعليقات

الى روح الأب الحنون مرسال بعيني/ عصام ملكي

يا ابو شربل يا اخي مرسال
المتلك كبار بها الحياة قلال
يا ابن عيله مرجحه العينه
بلا شك انو عيلة بعيني
طفل اللي فيها بينسما رجّال

السفره يا بو شربل علانيه
وحق السما مش هينه هيي
مش عدل بالستين انو الروح
تسافر ونبكي كلنا وننوح
تخمين رايح عا السما هديه

متـل الفرح اوجاع في عنا
من الأرض نحنا والأرض منا
لما غصب من حضنها مننشال
بيضل منا للزمن موال
وعا الحيط صوره وتانيه بالبال
تا نقول انو بها الدني كنا

بالعمر كلما مرحله قطعنا
بتصير عيشتنا بلا معنى
ما في لزوم نطالع الأخبار
وبكل هم نشغل الأفكار
بتاني دني اللي بيقربونا كتار
وفيهم بيحب الرب يجمعنا

وحياة هلي فوقنا اني
عا الأرض عم لاقي كذا انه
يا مطالعين الشعر دبُّـو الصوت
"طفوله" "وصبا" عنا "وكهوله" "وموت"
اربع فصول فصولنا هني

مرسال لما سافر من الدار
راح الفرح والحزن عنا دار
يا ام شربل راح المقمَّر
وصار الدمع عا فرقتو مجمّر
ودمع الولاد بلون احمر صار

شربل الابن وعيلتو بيبكو
ومع بعضهم بالآخ عم يحكو
ودمعة "كلير" و"ناتلي" طوفان
وجوزاف قالو مع العيله كمان
صريخ وبكي وللرب عم يشكو

وانطون دمعو غسل ثيابو
وعيون جورج من الدمع دابو
وجوزاف قال تجنزو الأفراح
قالوا التلاته بحيث خيّـن راح
صاير حضورون يشبه غيابو

وشربل بعيني شربل الغربه
وميشال خيو همومهم سربه
وقت البيبكو كلنا مننسم
شلحو تيابن لابسين الهم
بالروح في بيناتنا قربه

"مرسال" خيك شربل بسنو
القانون عا حالو عم يسنو
متلك انت منو بمية لون
انغلط شي مره مع حدا بالكون
بلمح البصر عم يعتذر منو

عليك البكي بالفعل صار  جنون
وطار الصواب ودمعو العيون
مرسال حبك عندنا مكفول
انو حدا ينساك مش معقول
بقدم تعازي لعيلتك وبقول
انشلله فدا عنهم وعنا تكون

مرسال منك انت كيف ما كان
للادميه بتنسما عنوان
وكمان عندي امها وبيا
من بعد ما عزّي مجدليا
بقدم تعازي للوطن لبنان

عصام ملكي الشاعر.. والمهرّج

عندما أخبرني الشاعر الصديق عصام ملكي عن برنامج حفل توقيع ديوانيه الملكي الثالث والرابع لم أصدق ما سمعت، فلقد غيّر طريقة توقيع الكتب، فبدلاً من أن يتكلّم شعراء ونقّاد عن أدبه، طلب من الفنانين والفنانات غناء بعض قصائده، وكان بين الوصلة والأخرى، يتحفنا بنكاته الرائعة، التي جعلتنا نضحك ونضحك ونضحك الى يومنا هذا.

أجل، لقد كان مهرجاً من الطراز الأول، وممثلاً محترفاً وهو يقلّد العجائز على المسرح، حتى أنني نسيت أنه شاعر كبير ترك بصماته على صفحة أدبنا المهجري، ورحت أقارنه بإيلي أيوب، وجان خضير، وغيرهما من أصحاب النكتة الفاقعة دون خوف من أحد.

عصام ملكي أراد من وراء كل ذلك أن يسعد ضيوفه، وأن يبرز موهبة فنيّة قد لا نجدها إلا عند القلائل في مهجرنا هذا. فاسمحوا لي أن أبصم له بالعشرة.

الشيء الوحيد الذي لفت نظري وأنا أراقب طاولة كتبه، أن الديوان الملكي الثاني لم يكن موجوداً على الطاولة. ونسيت أن أسأله لماذا عرض الدواوين الملكي الأول والثالث والرابع، واختفى الثاني عن الانظار؟.

ألف مبروك نجاح الحفل يا أخي عصام، وعقبى للملكي الخامس بإذن الله. 

شربل بعيني

أمك متل أمي/ عصام ملكي

يا شربل ما حدا لحّن وغنّى

لو ما الوزن بكلامك تبنّى

الصداقه اليوم صارت مستحيله

اذا بتساير العالم تأنّى

انا انسان جيلك متل جيلي

تا غيري كون مش عم إستمنّى

أمّك متل أمّي ومش قليله

إذا بأوصافها وجودي تغنّى

شاعر انت ومسجّل زميلي

وزمانك فيك عا الطاير تهنّا

بقلك بعد آخات الطويله

اجا لعندي اللي اسمو مار مينو

تا حتى يقول انو مار يوحنا

تحية من الشاعر عصام ملكي الى شربل بعيني

يا شربل بعيني أسامينا

انكتبت تا تاني يوم يمحينا

الضحكه ما هيي.. العيد منّو عيد

وبالشعر ما بتظبط قوافينا

مهما أخدنا من الدني زواويد

بيضل جوع العين عامينا

يوم الفرح معلوم عنّا بعيد

وتا نعيش متل الخلق ما فينا

صار العتيق كتير عنا جديد

ومكبله صارت أيادينا

لا انت بتريد وأنا ما بريد

ياخد معو النسيان ماضينا

صارت الضحكه عندنا تنهيد

وبالمأتم نوزّع تهانينا

اسمحلي تا قلّك والكلام بعيد

جينا بلا طعمه عا الدني من زمان

ومنروح منها متل جينا
**
الرجاء قراءة التعليقات