مجموعة شعرية جديدة للشاعر شربل بعيني بعنوان: اشتقنا

أصدر الشاعر شربل بعيني الكتاب الخامس لهذا العام بعد:
1ـ حذار أن تصادق شربل بعيني: فاطمة ناعوت
2ـ شربل بعيني ومعاناة الهجرة (مجموعة أشعار لشربل بعيني نقلها الى السريانية الاديب نزار حنا الديراني، كوردستان، العراق).
3ـ عجائب أمنا مريم (نقله شربل بعيني الى الفصحى عن العامية اللبنانية القديمة).
4ـ Joys and Tears (مجموعة أشعار لشربل بعيني نقلها الى الانكليزية الاستاذ ايلي شعنين ـ ملبورن). رسمت غلافه الفنانة مارسيل منصور.
وأخيراً "اشتقنا" الذي زينت غلافه لوحة رائعة للفنانة رندى عبدالأحد بعيني، ويتألف من 140 صفحة من الحجم الوسط. ومن قصائده نختار القصيدة التي تحمل عنوان الكتاب:
ـ1ـ
موجات البحر بْتطوينا
وبِتشلّع كل مْفارقنا
بْتشلحنا دمعه ع المينا
جْنون النطره عم يحرقنا
يا بْلادي اللي بتحبّينا
لا تخلّي الغربه تخنقنا
إنتي فينا.. ضلّي فينا
وحياة الأرزات.. اشْتقنا
ـ2ـ
اشتقنا للراحوا وتركونا
وكانوا الدبكه والدلعونا
وشمس الضحكه العم بتزهّر
"فوق غصنك يا ليمونَه"
من جنوني أبيات بعمِّر
تا الغربه تخفّفلي جْنونا
مراية عمري عم بتكسِّر
فيها وجوه اللي حبّونا
ـ3ـ
اشتقنا والله.. اشتقنا عْليكي
يا ضيعه.. مدّي إيديكي
حنّي علينا.. ولا تنسينا 
خبينا بزرقة عينيكي
كبرنا فيكي.. لا تجافينا
كلما بعدنا.. مْنرجع لَيْكي
الغربه مهما عتقوا سْنينا
ما منسى غبرة إجْريكي
ـ4ـ
الذكريات الحلوه بتمرُق
وما بفكّر إنّي عايشها
متل الزيبق.. لمّا بتدلُق
ضحكتها.. مين بيكمشها؟ 
عارف إيامي عم إحرُق
وعيوني.. القهر مْطمَّشها
وعارف شمسي مش رح تشرُق
وجودي بالغربه.. غاششها
**

ليست هناك تعليقات:

إرسال تعليق