الى روح رامز عبيد

ألقيت هذه القصيدة في مهرجان الشاعر الراحل رامز عبيد الشعري في 13/11/2015
ـ1ـ
قومي افتحيلو الباب.. محبوبك وصَلْ
يا جميله.. وحامل كتابو معو
عوّد عيونك ع المحبّه والغزل
وحياة عينك كلّنا رح نسمعو
جايب معو حساسين من هاك الجبل
تا يوشوكي كم كلمه.. ويرجعوا
بنتين عندو.. يا شعر نقّط عسل
ويا وحيد الدار.. قلّن يسطعوا
قلبو حنون كتير.. ما بيحمل زعل
كلما بكي.. بتولد قصيده بمدمعو
ويا جورج هاشم كيف نجّحت العمل
وضويت بدر الشعر بليالي الأمل
حتى القصايد تنبنى من مقلعو
ـ2ـ
من جديد راجع شوفك من جديد
واسمع يا رامز صوتك من بعيد
جايي وحامل شعلة الديوان
والنور عم بيشعّ متل العيد
وخلفك قصايد.. تشبه الفرسان
انرسمت بإيدك.. لا توطّي الإيد
والناس متل القمح بالميدان
تهوبر إلك.. يا سيّد التجديد
يا شاعر اللي كنت وقت الكان
شعر المهاجر خابيه ونبيد
يا مكحّل التربه بأرض لبنان
وهالكم حبّه من التراب تعيد
الأحباب رفضوا يلفّك النسيان
روح الوفا فيهن.. ما بقدر زيد
جمعوا الشعر تا يزينوا الهجران
وشعرك حلو.. مش ناقصو تمجيد
شو بخبّرك عن رفقة الإخوان
عم ينقصوا الشعّار.. بالتحديد
فلان ختير.. عم يموت فلان
وفلان.. صدرو راكبو التنهيد
يا شعلة الكلاّ وفا وإيمان
مأكّد أنا.. بـ جنّة الرضوان
عم تسقف بيوت الشعر قرميد
ـ3ـ
سكوت القبر مش لاك.. محّي سكوت
عملاق.. ما بيساعك  التابوت
أنت مجد الحرف والأشعار
ع صفحتك عم تنبنى البيوت
ليش ساكت والبلد منهار
وفوق الزباله معرّم الطاغوت
براغيت عم تحكم وطن جبّار
ويا دلّ شعب بيحكمو برغوت
ما سكتت مرّه.. كنت تطفي النار
وتحمي طفل.. عم يسرقولو القوت
لبنان سايب.. واللصوص كتار
شقّ القبر.. مش حقّ إنّو تموت
يا مركع التاريخ والأقدار
يا مسيج الأكوان بالياقوت
مسمرت قلبك فوق هاك الدار
تا تسكن بمتريت ليل نهار
وتا تشم ريحة أمنا بيروت
شربل بعيني

ليست هناك تعليقات:

إرسال تعليق