قصيدة شربل بعيني في عرس ابن أخيه جوزيف مرسال بعيني وتلميذته تريز انطوان الدريبي

بناء على نصيحة بعض الأصدقاء، وخوفاً على صحة والد ووالدة العروس السيد والسيدة أنطوان وأنطوانيت الدريبي، لم ألقِ المقطع الرابع من القصيدة في العرس، كوني استنطق فيه ابنهما المرحوم الملاك بيار الدريبي، وها انا أنشر القصيدة كاملة الآن:
ـ1ـ
الحب لمّا بيجمع القلبين
منقول: زهّر ورد بجنينه
واليوم عم نفرح بأحلى تنين
بنت الدريبي وإبن البعيني
ـ2ـ
يا دجو البعيني.. إبن مرسال
خيّي الزغير الـ بعبدو عباده
الشعره الـ بِراسو لو زمانو طال
بضحّي بحَياتي.. وأكتر زياده
متل النبي أيوب حمل حمال
من التضحيّه.. تا يفرّح الفادي
وهّالْـ لور إمّك.. لفّتك بِـ شال
كلّو صلا وطلبات وعباده
هاي أم شربل حاضنه العيال
خود منها الحب زوّاده
عيلة قداسه.. بتنحنيلا جبال
بدرس المحبّه بتنعطى شهاده
وإنت بيرق عز ما بينطال
بنصّ منّو.. أرزة بلادي
ـ3ـ
وهالعروس الزيّنت حدشيت
تلميذتي.. وبعرف خَصايلها
كانت تقلّي متل إمي ربيتْ
وشربت من نعمة فَضايلها
أنطوانيت الْـ متلها ما لقِيتْ
شهدت دني روعة عمايلها
وطوني الدريبي من حنانو جيتْ
ع هالدني البالحبّ جمّلها
بنتين عندو.. وحافظ التوقيت
أيّا بنت بدّو يدلّلها
مع إخوتي عَ فرد درب مشيتْ
عيلتي زغيره.. ما أجملها
لكن في غصّه بقلبها.. ما نسيت
لمّن إجا المطران كللها
سألت حالي.. ومن سؤالي بكيت:
وين خيّا بيار.. يحملها؟
ـ4ـ
بالحلم شفتو من السما جايي
متل الملاك.. بأجمل حكايه
سمعتو بيقللي: بوّس العرسان
وكتّر، إذا بتريد، تهنايه
تريز، متل الشمس، بالفستان
من ضحكتا بتغار المرايه
رفاق كنّا بعتمة الهجران
تقللي: يا خيي محبّتك آيه
لمّن غبت ما خفت ع أنطون
خفت إمي بقلبها المحزون
ترفض تكفّي عمرها بْلايي
ـ5ـ
يا تريز.. الشعر بيقللي
مار مانوس كتّر الغلّه
قديس حدشيتي بسمانا كبير
بعصر الكفر والموت والقلّه
متلك أنا رح شبّعو تبخير
وهالمسأله يلاقيلها حلّه
بعد الزواج بيحصل التغيير
تا الرب يحميلك جوزاف كتير
لمار يوسف لازم تصلّي
**
شربل بعيني
سيدني 31/1/2015

هناك 3 تعليقات:

  1. جورج منصور1:40 م

    الى العروسين الحبيبين جوزاف مرسال بعيني وتريز انطوان الدريبي:
    يا عريس الزين لا تهتم
    فتّح ورد نيسان ع كمامك
    وبسمة عروسك متل بدر التم
    انشالله بتضوي كا ايامك
    انتو جماعه حبكن بالدم
    وعمك معلّي للسما هامك
    مين عندو متل عمك عم
    قدّامك ولو ما رقص بالسيف
    شعرو رقص بالسيف قدّامك
    جورج منصور

    ردحذف
  2. جورج منصور1:41 م

    الى العروسين الحبيبين جوزاف مرسال بعيني وتريز انطوان الدريبي:
    يا عريس الزين لا تهتم
    فتّح ورد نيسان ع كمامك
    وبسمة عروسك متل بدر التم
    انشالله بتضوي كل ايامك
    انتو جماعه حبكن بالدم
    وعمك معلّي للسما هامك
    مين عندو متل عمك عم
    قدّامك ولو ما رقص بالسيف
    شعرو رقص بالسيف قدّامك
    جورج منصور

    ردحذف
  3. Nasser Beaini10:31 م

    مبروك من صميم قلبنا للعروسين ، وهنيئا لجوزيف بالعروس وبهذا العم الذي ما زال يتدجج بمكارم الاخلاق وعنوان الفروسية ليفرش ظلالا ً محاكةً بخيوطٍ من المحبة والحنان والانسانية ، ليسرد لهم وصية شعرية وصفية تصلح لكل انسان . شكرا شربل البعيني (بدون القاب، فنحن من يصنع اللقب )

    ردحذف