قصيدة عصام ملكي حول ديوان "فافي" لشربل بعيني

ـ1ـ
يحيا الجهاد بفاطمه ناعوت
بواقع وطنها كلامها منحوت
عليها بيصلّي زْمانها وبيصوم
وفيها قيامة شعرنا بتقوم
من باب واسع عا الوحي بتفوت
ـ2ـ
تا إهرب من الحقّ ما فيي
فافي.. بتجي عا البال يوميّه
عذري معي إن صبتها بالعين
مش بس عندا أم.. عندا تنين
والتانيه.. أم الدني هيّي
ـ3ـ
ببنتِك يا مصر بقلّك تهني
إلها الدني مواويل بتغني
بحلف على الانجيل والقرآن
بالمتل "فافي" تشرّفو الاوطان
ومَنّي أنا عم زيدها مَنّي
ـ4ـ
بـْ "فافي" ان شكرت بيعرضو كتافي
وأحلى من الـ "فافي" حدا ما في
شربل بعيني الحق عنها قال
ولما كتابو خلّصو بالحال
قلّو الزمن يعطيك العوافي
ـ5ـ
شربل بـ "فافي" بمنطقو العلمي
بيقول إلها محبتي استلمي
ولما أنا بكتاب "فافي" قريت
حسّيت حالي عا الأرض ما بقيت
ومفروض إلها توصل الكلمه
ـ6ـ
بشموخها طلعت على المريخ
ببيت العداله شافت فساويخ
عطيت قلمها للشعب والروح
وهيي على التاريخ ما بتروح
بدّو وراها يركض التاريخ
ـ7ـ
كل الشعب من فاطمه ممنون
عا ألوف فيها كل ساعه تمون
كل العقد بوجودها بتنحلّ
انكان العدل عا الارض عندو محلّ
لازم رئيسه لمصر هيي تكون

هناك تعليق واحد:

  1. قصائدُ تُلهم الشعراء ليكتبوا قصائدهم. ديوانٌ أجّج الشعرَ في قلوب الشعراء. مُلهِمٌ وزّع إلهامَه الريّان على ناثريّ الدُّر فوق الأوراق العطشى.
    شكرًا للشعر الجميل.
    شكرًا لشربل بعيني.
    شكرا لعصام ملكي.
    وشكرًا لله أن جعل من جنية الشجر الطفلة، سببا لكتابة كل هذا الجمال.

    فاطمة ناعوت

    ردحذف