شربل بعين الكل/ عماد الحاج

شاعر مهجري


شربل.. بعين الكلّ
شربل.. بعين الكلّ
متل الفلّ
شعرو عطر، شعرو وحي وإلهام
فوق الحرير الأطلسي بينام
ومتل القمر بيطلّ
معروف إنّو "شاعر الغربه"
فكرتو.. ولا يوم مِنْورْبِه
كل ما شلح أبيات عَ الطاير
بيصير عقل المستمع حاير
من النّوم فيّق شعرنا الغافي
مرهمو شافي
بأللـه ونقطة زيت
وشوش السكّيت
بملاّح.. عم يبحث عَ أللـه وين؟
محمد الباشا قال: يخزي العين
"الحاج" يا شربل بشعرك داخ
أحلى مناخ
و"بستوبّ" كلماتك
فيها شرح ذاتك
بمعارك الأشرار لا تنزج
خلّيك للكلمه اللطيفه محجّ
البيرق، العدد 168، 27/11/1989
**
مبروكه الأسامي
أملنا.. هربت الإيام منّو
ومتل البرق عمر الابتسامه
كأنّو عصرنا جنون.. وكأنّو
علينا واقف نهار القيامه
وين الـ بالحياة بيستمنّوا
يشوفو نوح وصلتلو العلامه
ما عادوا بيّنو.. انطفيو لأنّو
عليهن قالبه نفس الكرامه
يا مار مارون فينا نقول: إنّو
بدنا عطف متل النار حامي
علينا، بالكفر، غارات شنّوا
وعلينا، ركّبوا كل الملامه
ويا مار شربل دخيلك شوف كنّو
عنّا بتقدر تشيل الغمامه
تا حتّى يرجع الشاعر لفنّو
وبعرس المجد تا نرش القضامي
بسيدني.. بشعرنا العالم تحنّوا
وقالوا: يا عروس الشعر نامي
وبشربل شاعر الكلمه تهنّوا
وقالوا متل ما ع السطح قلنا
بأعلى صوت: مبروكه الأسامي
البيرق، العدد 221، 6 تموز 1990
**
عزك دام
ـ1ـ
يا "شربلنا" عزّك دام
قالولي: طلّعت كتاب
وصرلي سبع تمان تيّام
ناطر تا شوف الأحباب
ـ2ـ
عنّك.. قديش سألنا
ودار الأخذ.. ودار الردّ
وبعد الجهد توصّلنا
إنّك ناسينا عن جدّ
ـ3ـ
حبّينا نقول: عملنا
حاجز بين الجزر ومدّ
تاري يا "بعيني" نقلنا
من الدلفه لتحت المزراب
البيرق، العدد 207، 8 ايار 1990
**
مختار الكلمه
ـ1ـ
يا شربل.. من آل الحجّ
هديّة إخلاص منهديك
إنت لنظم الشعر محجّ
وكل العيله بتشكر فيك
ـ2ـ
يا شربل.. عنك ما غاب
إنك بتضل بعيني
هنيّال الـ عندو أصحاب
متلك يا إبن بعيني
ـ3ـ
إنت الأصل مفهّمنا
ومختار الكلمه بعلمي
ومنك نحنا تعلّمنا
نحطّ الكلمه ع الكلمه
صوت المغترب، 1990
**
قنبله
شربل.. كتابين وصلوا مع عصام
ناطر تا حتّى تبعت الْبَقْوِه إلي
متلك زميلك عم بيحفظلك مقام
وبيقول إنّك ع المنابر.. قنبله
بالجمعتين.. بقلّك: تنعشر سلام
ببعتلك ومنّو السلام مجامله
كلّو لأنك شاعر وصبت العلام
وبيت الشعر عندك ما بدّو معامله
يا شاعر الغربه الطويله للأمام
خلّيك ماشي والأماني مرسمله
ومن جهّتي بتضلّ تحظى بإهتمام
بلسان كل الـ عارفينك عم بقول:
متلَك حدا بالشعر ما ناجى "علي"
سيدني 1993
**

ليست هناك تعليقات:

إرسال تعليق