اليوم عيد البيّ.. يا بييّ

شعر شربل بعيني


-1-
الْيَوْم عِيد الْبَيّْ.. يَا بَيِّي
يَا وَطَنْ.. عَمْ بِتْئِنّ لَيْلِيِّه
صَرْلِي عُمر حَوِّشْلَك الْقصْدَانْ
تَا قَدِّمُنْ بِالْعِيدْ.. عِيدِيِّه
تَارِي الشِّعرْ مَا بْيِطْعم الْجُوعَانْ
وْلا بْتِنْفَع الْمَحْزُونْ غِنِّيِّه
مَهْمَا عْيُونَكْ تِذْرُف الأَحْزَانْ
حْبَسْتَكْ فَرَحْ جُوَّاتْ عِينَيِّي
وْمَهْمَا الْغُرْبِه تْغَيِّر الإِنْسَانْ
وْتِزْرَعْ بِـ فِكْرُو خْبَارْ وَهْمِيِّه
بْتِبْقَى إِلَكْ: آياتْ مِنْ لُبْنَانْ
تْمَجّدَكْ بِالْهَجْرْ يَوْمِيِّه
وْغِيَّابْ، يِخْزِي الْعَيْنْ، وَينْ مَا كَانْ
بِزْنُودُنْ الْبُلْدَانْ مِبْنِيِّه
وْشَطْحَاتْ صُورَه.. رَاسِمَا فَنَّانْ
فِيهَا الْهَنَا.. فِيهَا شعب فِرْحَانْ
رِجْعِتْ إِلُو الْجَنِّه الإِلَهِيِّه..
-2-
الْيَوْمْ عِيدْ الْبَيّ.. يَا عْيُونِي
يَا مَارِقْ بْإِيَّامْ مَجْنُونِه
كِيفْ بَدِّي عَيّدَكْ وِالنَّارْ
عَمْ تحصُد الأَهْل اللِّي رَبُّونِي
وْعَ الأَلْفْ لِيرَه تْسَلَّط الدُولارْ
بْطُونْ الْبَشَرْ لِلْغَرب مَرْهُونِه
وْعَ خْدُودْ وِجَّكْ خَيّمُوا الأَشْرَارْ
وْتَحت الْخِيَمْ.. أَجْسَادْ مَدْفُونِه
بْحَلّفَكْ بِالأَرْزْ.. مَهْمَا صَارْ
لاَ تِيأَس مْنِ النَّصْرْ.. لا تِنْهَارْ
بَعْدَكْ عَ صَدر الْـ هَاجَرُوا.. قُونِه
-3-
الْيَوْمْ عِيدْ الْبَيّ.. يَا حُبِّي
يَا وَطَنْ.. دَقُّوا شْلُوشَكْ بْقَلْبِي
تْغَذَى بْدَمِّي.. الدَّمّ عَ حْسَابَكْ
بِـ كل نِقْطَه زَارع مْحَبِّه
شُوف الأَسَى بِعْيُونْ غِيَّابَكْ
بْيِحْكِي قِصَصْ أَيَّامُنْ الصَّعْبِه
كِيفْ رَكْعُوا سْنِينْ عَ بْوَابَكْ
يْدِقُّوا عَ صَدْرُنْ.. تِرْجَع الطَّلْبِه
وْلُوهْ.. شُو اللِّي صَار.. شُو صَابَكْ
مَا عِدْتْ تِنْدَه: عُودْ يَا شَعْبِي؟!
قَلُّوا اللِّي فِيكْ.. وْطَيْشَرُوا حْبَابَكْ
يَللِّي تْرَابُنْ حَنّ لِتْرَابَكْ
.. حْرَامْ تِدْفُنْ شَعب بِالْغُرْبِه!!
**

هناك تعليقان (2):

  1. حنان9:13 ص

    يسلم تمك.. وهنيّال لبنان فيك.. وألله يرحم بيّك
    حنان

    ردحذف
  2. غير معرف9:15 ص

    أحلى هدية استلمتها في هذا العيد.. لقد حرموني من أبي لبنان.. لعنهم الله.
    والد مهجر

    ردحذف