إلى حبيبي الجنوب.. إلى حبيبتي بنت جبيل

لقد غنيت بنت جبيل بأجمل قصائدي.. فوهبني أبناؤها الإنتساب إليها، وأهدوني التكريم والحب، فأصبحت بنت جبيل بلدتي وحبيبتي.. لهذا أجد نفسي مهزوماً إذا هزمت، ومنتصراً إذا انتصرت.. وهي ستنتصر لا محالة، لأنها أعطت لبنان خيرة أبنائه، مثل أخي الحبيب الدكتور علي بزي، والدكتورين خليل وقاسم مصطفى، وابراهيم سعد، وغيرهم العديد من أهلي.. أهل بنت جبيل العزيزة الغالية. فإلى حبيبي الجنوب وحبيبتي بنت جبيل أهدي هذه القصيدة:
شربل بعيني
ـ1ـ
إنت الأوَّلْ.. إنت الأوَّلْ
وْبَعْدَكْ مِحَيّت الأَرْقَامْ
بْهَامَات الأَبْطَالْ مْكَلَّلْ
بْصَرْخَه.. نِسْيِتْها الأَقْلامْ
يا جْنُوبي.. يا طفل مْدَلَّلْ
هِدْيُوك بْعِيدَكْ ألْغامْ
عَنْ حُبَّكْ مُشْ رَحْ نِتْحَوَّلْ
مَهْمَا تْشَرِّدْنا الإيامْ
وْمَهْمَا الْفِتْنِه تِطْلَعْ.. تِنْزَلْ
مَا مْنِتْرُك شَعْبَكْ مِنْضَامْ
عَدُوَّك.. بِالشَّر مْأَصَّلْ
دمّو بيفَوِّرْ إجْرَامْ
كِذّابْ مْنَافِقْ ما بْيِسْأَلْ
هَمُّو يِقْضِي عَ الإسْلامْ
هَمُّو النَّصَارَى تِتْشَنْطَلْ
وِالنِّجْمِه تْرَكِّعْ أَعْلامْ
عَدُوَّكْ يَا جْنُوبي مْبَهْدَلْ
مِتْلِ الدّبَّان الْمَا بْيِخْجَلْ
بِتْكِشُّو.. بيِرْجَعْ يِتْسَلَّلْ
بدّو عَ فَرْشِتْنَا.. يْنامْ
ـ2ـ
قاوِمْ بِـ ضافيرَكْ قاوِمْ
هْدِينَاكْ الْقَامَاتْ سْلالِـمْ
قَانَا.. ما نِشْفُوا دَمَّاتَا
قَتْلُوا فيها الطّفل الحالِـمْ
قَتْلوا الْبَي الـ بِجْنَيْناتا
فاتِـحْ لِلأطيار مْطاعِمْ
قَتْلوا الأم الـ عَ دَيَّاتا
رقْصِتْ بِالأَعْراس مْحارِمْ
قَتْلوا الْعَدْرا وِصْلاوَاتَا
وِالإمامْ الْـ بَعْدُو صَايِمْ
إسرائيل.. اللّعْنِه بْذَاتَا
هِزَّا.. فزّعها.. رَبِّيهَا
مَلْعُون اللِّي بَدّو يْسَاوِمْ
ـ3ـ
يَا دِلّ الْـ ما بْيِحْمِي أَرْضُو
يَا دِلّ الْـ عايِشْ جَبَانْ
يَا دِل الْمستَرْخِص عَرْضُو
وْعَمْ بِيبِيعُو لْمِين مَا كانْ
وَحْدُو شَعْبَكْ كاتِبْ فَرْضُو
وْعَمْ بِتْزَقِّفْلُو الأزْمَانْ
ومهما عْلَيْكْ الْقُوِّه فَرْضُوا
ما بْيِرْكَعْ فِيكْ الإنْسانْ
أَبْطالَكْ صَعْبِه يِنْقِرْضُوا
هِنِّي الْحَق بْطُولُو وْعَرْضُو
وْعَمْ يِكْبَرْ فيهُنْ لُبْنَانْ
ـ4ـ
عامِلْ.. باقِي الْجَبَل الْعَالِي
وْمُشْ رَحْ يُوطَى مَهْما يْكُونْ
ضَحُّوا كِرْمَالُو بِالْغَالِي
وِانْزَرْعِتْ بِتْرَابُو عْيُونْ
عَ صْخورو تْبَوْدَرْ مُوّالي
الْفَالِتْ مِنْ شَاعِرْ مَجْنُونْ
وْعَ تْلالُو وِقَّفْت عْيَالِي
قَامَاتُنْ شَجَر الزَّيْتُونْ
يا جْنُوبي تَا تْرَيِّحْ بَالِي
لازِمْ تِفْضَحْ.. أُوعا تْبَالِي
الْـ بِيخُونَكْ.. أَللّـه بِيخُونْ
ـ5ـ
بنْت جْبَيْل.. الأَرْض الْخَضْرا
الْـ خِلْقِتْ بالْعِزّ وبالْقِدْرَه
غِنَّيتِلاّ غْنَانِي كْتِيرِه
تَا دَاوِي بِالْكِلْمِه.. قَهْرَا
جِيرِتْهَا.. يَا مَحْلَى الْجِيرِه
شَعْبَا.. بِيخَبِّرْ عَنْ طُهْرَا
بِنْت جْبَيْل كْبيرِه.. كْبيرِه
مِن عُمْر البُطولِه عُمْرا
يا جْنُوبِي .. شِي بَوْسِه زْغِيرِه
شْلَحْهَا فَوْق خْدُودَا الْحَمْرَا
بْحِبَّا.. أُوعَا تِفْتَحْ سِيرِه
بْعَتْلِي مِينْ يْطَفِّي الْجَمْرَه!!
ـ6ـ
إنْسانَك.. هُوّي عنْوانَكْ
وْمِقْرِيِّه حْروفو.. إنْسانَكْ
لِلضَّيْف مْشَرَّع أَبْوابو
وْبِالْخَيْر مْعَبَّى بُسْتانَكْ
مَجْدو مْعَلَّق فَوْق عْتابُو
وِبْيِرْخَص مَجْدو مِنْشانَك
وِعْذَابُو.. مَشْهور عْذابُو
اسْتَشْهَد مَعْ إِبْنُو بْمِيدانَك
العالَـم ما بْيِشْعُر بِمْصابو
دَمُّو فَجَّرلَكْ أَلْوانَك
خْلاَصُو.. مَرْهون بْأَحْبابو
اللِّي زَرْعوا سْنِينُنْ بِتْرابو
خْلاصُو.. مَرْهُون بْلبنانَك
ـ7ـ
حُكَّامَك.. مَنْشور وْكِلْمِه
لا تْصَدِّق كِلْمِةْ حُكّامَكْ
الْحاكِمْ ما في بْقَلْبُو رَحْمِه
قاعِدْ عَ كِرْسِي مْنِ عْضامَكْ
عَلِّمْ أَطْفالَكْ عَ النَّقْمِه
بَرْكي بْتِتْغَيَّرْ إِيَّامَك
بَرْكي بْيِبْنُوا فينا الأُمِّه
اللِّي بْتِقْدِرْ تِرْفَعْ أَعْلامَك
حُكَّامَك ما فِيهُنْ زَلْمِي
بَعْدُنْ عَمْ بِيمِصّوا الْحَلْمِه
وِيْبُوسُوا إِجْرَيْن الْحرْمِه
صارْ وَقْتْ يْبُوسُوا.. أَقْدامَكْ

هناك 7 تعليقات:

  1. غير معرف9:04 م

    ابن الأصل ما بينحاف عليه.. وإنت إبن أصل يا شربل، وبنت جبيل ما غلطت لمن سمتك إبنها.
    قصيدتك كتير حلوه ومعبّره وبتبكّي
    ألله يحمي الجنوب.. ألله يحمي بنت جبيلنا.. ألله يحمي لبنان.

    ردحذف
  2. غير معرف9:33 م

    يا شاعرنا العزيز
    ولو سقطت بنت جبيل ولو سقط الجنوب.. نحنا ربحنا.. لأن الجيش الاسرائيلي صرلو جمعتين ما قدر يحتل ضيعه زغيره، بينما بخمسة ايام كان احتل الدول العربية سنة 1967. المقاومة علمت الصهاينة درس مش رح ينسوه كل عمرن.

    ردحذف
  3. غير معرف5:54 ص

    اخ من وجعك ومن وجعى ومن اوحاعنا جمعيا لم تسقط اى مدينة او قرية ابنانيه انما سقطت هذه العروبة التى تسمى دولا عربية لنا قوة سواعد رجالنا ومعنا الحق

    عيسى القنصل

    ردحذف
  4. إلى العزيزين المجهولين:
    أشكركما على محبتكما.. وأتمنى أن نتخلص من آلامنا، وأن تتحقق أحلامنا، كي يعيش وطننا الحبيب لبنان كما يجب أن يعيش: سيداً حراً مستقلاً.

    ردحذف
  5. إلة الشاعر الكبير عيسى القنصل
    أتمنى يا أخي العزيز أن نتخلص معاً من وجعك ووجعي. فأوجاع الشعراء مؤلمة جداً جداً، وأنت أدرى مني بذلك.
    لك محبتي الدائمة. ومجلة ليلى تحت أمرك.

    ردحذف
  6. غير معرف10:43 ص

    كان عندنا مقاومة تحمينا
    وتحمي عرضنا وأطفالنا وأراضينا.
    الكوندليزة نقلت رأي قادتنا
    وعلقت الجرس فوق رقابنا.
    دخل الجمل راسه بخيمتنا
    ونحن جوا في بيتنا
    بعدها دخل جسمه كله بخيمتنا.
    ما في حماس وحزب الله تحمينا
    ولا أحنا قادرين على بقائنا
    فهربنا من خيمتنا وبقي الجمل في بيتنا
    فوالله ستزول عروش كثيرة بين عربنا
    وقاداتنا سيأخذون معاشتهم من اولياء غضبنا
    فيا أخ العرب شربل ، اصبحت منا
    ، بعد مرور 58 عاما مطاردا لاجئا

    ردحذف
  7. غير معرف11:43 م

    شكرا يا استاذ بعيني على هذه القصيدة الرائعة، لك من بنت جبيل احلى القبلات وكل التقدير والاحترام

    وضاح جمعة

    من بنت جبيل

    ردحذف