ظروف تعبانين/ عصام ملكي

يا شربل بعيني تلف حدّي
لعند البلا أخلاق ما بعدي
بتشرين نحنا ومتلنا ملايين
قديش بدنا بهالدني نهدّي

نحنا عن اللي صار مسؤولين
عطينا اللي ما بيستاهلو مودّه
بقلّك أنا بلسان "بشمزين"
الفيها خلقت وبمنطق الجدي

صاحب إذا بتشيل من خمسين
قللي يا "ملكي" ما حدا قدّي
الهنّي بشر عا الأرض معروفين
بفرح عند ما بشوفهم حدّي

وبالرغم إنّي ما معي عناوين
سلامات للي سافرو بودّي
شالح ورايي "تنين وتمانين"
وما عرفت عمري صار هالقدّي

عندي رفاق تقمّصو شياطين
وما بيعرفو الشدّه من المدّه
ومن حيث عندي ظروف تعبانين
بدّي اللي متلك مستقيم وبس
أصحاب كيف ما كان ما بدّي
**

هناك 10 تعليقات:

  1. لطيف مخائيل10:32 م

    قصيدة مهمة من وحي الواقع المعيوش
    لطيف مخائيل

    ردحذف
  2. د. بهية ابو حمد8:09 ص

    ليش الحزن واليأس يا أستاذ عصام؟
    الدني بألف خير.
    ما فينا نغير الناس .
    **
    دكتورة بهية ابو حمد

    ردحذف
  3. انطون برصونا ـ زغلول الزغرين8:54 م

    عرفتك يا ملكي من زمان بعيد
    وقلت لحياتي هالشهم ليكي
    بقلك انا وبعيدها وبزيد
    منو حدا الما بيعرفك هيكي
    انطون برصونا ـ زغلول الزغرين

    ردحذف
  4. جان مفرج2:37 م

    ما بدنا صحبة البيكون تمسح
    وهللي غدرنا وإيدنا لسّح
    بيعن وجيب بحقهم بويا
    انكنت بدك شي غرض تمسح
    جان مفرج

    ردحذف
  5. طوني هاشم2:40 م

    يا شربل وعصام بالاجماع
    قلوب البشر قديش بدها تساع
    بالرغم عني واقع بحيره
    وصارت طريقي كلها تلاّع
    الهم بيجي من دون تأشيره
    والآخ عم يطلع طويل الباع
    في ناس بيروحو بربع ليره
    وفي ناس بفرنكين عم تنباع
    طوني هاشم

    ردحذف
  6. محسن خليل2:43 م

    يا عصام وشربل الحبوب
    اليوم الغلاظه عم بترخي بدار
    عندك بشر ما عندهم اسلوب
    شاف بزمانو كتير ها الختيار
    محسن خليل

    ردحذف
  7. جورج خوري3:07 م

    يا شربل وعصام الله يعين
    في ناس كبرو وبعدهم عجان
    هللي بيرافق ناس جربانين
    متل العا بيتو بيعزم الدبان
    جورج خوري

    ردحذف
  8. ديب حيدر3:09 م

    بجادل انا ومواهبي بيدر
    البيقول مني قدها مجنون
    ديب اسمي وعيلتي حيدر
    الصاحب ضروري متل خي يكون
    ديب حيدر

    ردحذف
  9. انور سليمان7:28 م

    اليوم القدر عم يبرم الدولاب
    بعدة قطط عم يعملو نمورا
    المنهم حدا وعم يعملو ارباب
    بفحص الصداقه بياخدو صفورا
    انور سليمان

    ردحذف
  10. جان نجم7:30 م

    لازم بسيدني ينعمل اضراب
    عا شعب سوري وشعب لبناني
    صارو بعض اصحابنا اغراب
    الما صار صيني صار طلياني
    جان نجم

    ردحذف