الى الصديقين أكرم المغوّش وشربل بعيني/ روميو عويس

عندما استلم الشاعر روميو عويس كتاب الاعلامي أكرم برجس المغوّش الجديد "شربل بعيني ترنيمة حب" أعجب به كثيراً، فالتقطنا له صورة وهو يحمله، بعدها بقليل زوّدنا بهذه القصيدة الرائعة:
شربل وأكرم
ـ1ـ
لمّا الحكي ع الشعر والكتّاب
شربل بعيني الشاعر الأكرم
ما في حدا يجمع شمس بكتاب
شربل الشمس شروقها بلا غياب
وكبير انت كبير يا أكرم
ـ2ـ
شعر شربل للسما حلّق
بماضيه، للمستقبل، وهلّق
الشاعر انْ مات الشّعر ما بيموت
بيضلّ للأجيال زاد وقوت
وبيضل صوب المجد يتسلّق
ـ3ـ
بالشعر.. نفحات الأولوهيّه
مدابح صلا.. وبيوت مبنيّه
لوحات.. بتلاوينها في سحر
ما همّ أيّا وزن.. أيّا بحر
المهم في لمعات مضويّه
ـ4ـ
إبن المغوّش للوفا عنوان
إنسان خلقه.. بداخلو إنسان
بمهنتو متل النحل دوّار
الشهد بجرار الصحافي خبار
الْبدّو خبر.. المغوّش الخزان
ـ5ـ
تسلم يا أكرم.. صاحب المبدا
حملت الرساله وطلعت قدّا
مربّى ع كبر النفس والأخلاق
بلا تفرقه.. رفاقك ع طول رفاق
وع حدود غيرك ما بتتعدّى
ـ6ـ
شربل وأكرم بـ جوّ العيد
بغمرة فرح.. خلقان طفل جديد
جايي تا هنّيكم بهالمولود
حامل قصيدة شعر.. غمر ورود
يا رب بعمار التنين تزيد
**