دمعة الشاعر روميو عويس على الوالد المرحوم مرسال سركيس بعيني

الشاعر روميو عويس
كلمة رثاء القاها الشاعر روميو عويس في مأتم الغالي مرسال سركيس بعيني شقيق المربي الشاعر والاديب شربل بعيني، بعد الصلاة التي اقيمت لراحة نفسه في كنيسة سيدة لبنان - هارس بارك - سيدني استراليا يوم الاثنين في 25 كانون الثاني 2016.
ـ1ـ
بَكَّر عليك الموت يا مرسال
ما اظلمو، كيف غَيَّر الاحوال
فَرَّق على حبابك بيارق سود
وخلّى العيون، دموعها شلاّل
ـ2ـ
بَكَّر يا اصغر خَي بالعنقود
عنقود.. حَبّو كان ست رجال
رجال؟ بِ حفظ الكرامه اسوُد
رجال.. صدْقُن والوفا رسمال
حبُّن لْبَعْضُن حب ما لو حدود
وبقلوبهُن؟ حب الوطن قتّال
رجال.. أكلو خبزُن بمجهود
رجال اللي متلُن بالشهامه قلال
شربل مُرَبّي.. وبالشعر بتجود
كَرْمَك بكل فصول نَبْع غلال
عطيت الأدب عمرك بلا مردود
وبالمدرسه شو ثقَّفت أجيال..
وكتبك غِنى بالمكتبه.. لعْهود
واسمك بدنيا الأدب.. مشعال
ـ3ـ
يا "مجدليا" الرب بالتكوين
خَلقك جميله.. وزاد امجادك
بيحترق قلبك.. اذا محبّين
ترابن غفي بغَير تربة بلادك
اليوم؟ متلك قلب " رشدبّين "
صابو حداد.. بيشبه حْدادك
عَ صهر غاب بمطلع الستّين
بسمعتو الحلوه.. شَرَف زادك
ويا لور: عارف قلبك المسكين
باكي.. وغابت بَهجة عيادك
بجرح الحزن.. شدّي على السكين
وشوفي رفيق العمر بولادك.
ـ4ـ
كلُّن اجو وبقيت وحدك من زمان
مع أهلَك بلبنان، ما جْرَحت الحنان
ما رضيت يبقو بالوطن من دون حَدا
بقيت معهُن.. تَ يحسّو بالامان
ورفيق دَربُن كنت عَ طول المدى
ووقت اللي صارو فَوق بديار الجنان
تخمين نادو.. وانت لبّيت الندا
ورحت قبل الكل عَ الجنه كمان.
ـ5ـ
نحنا منجي بلا مشوره عَ هالدني
منعيش افراحا، وظروفا المحزنه
وأقدارنا؟ بتلعب متل ما بدّها
متل الحرامي كل ايام السنه
ملاحقتنا،.. وسيفها بِ يَدّها
ووراق نَعْوتنا عَ طول مْعَنْوَنه
عالدقيقه.. عمارنا بتحدّها.
وأرواحنا أْمانات الله المتمنه
فينا وَضَعها وعَ مَزاجو عَدّها
بعمر الصبا، بسن الكبر، بالولدنه؟
ساعة ما بدّو امانتو بيردّها
ـ6ـ
مرسال يا قافي عَ ضَهْر الخَيل
يا ريت بيردَّك دَمع عَيْني!..
بس القدر زَوَّد سواد الليل
وحط حاجز بينك وبيني
بشارك العيله بدمعتي عَ الوَيل
وحامل تعازي بالقلب من مَيل
لعيلة بعيني.. وشربل بعيني
**

ليست هناك تعليقات:

إرسال تعليق