دمعة شربل بعيني على عمّه المرحوم بولس بعيني

ـ1ـ
خسرناك يا بو الياس.. يا عمّي
خسرناك يا نبع المحبّه والحنان
يا بولس بعيني.. النار بِـ دمّي
والدمع من كتر الدمع يئسان
هَمّي كبير.. وزدت ع هَمّي
مات آخر عَمّ... بالهجران
سلّم عَ بيّي وقلّها لإمّي
أيتام صرنا.. مات بي الكل
وبكيت الأرزه بِـ جبل لبنان
ـ2ـ
قالوا: كِبِر.. وإنت بْعينَيْنا كْبير
ناطور كنت.. بْتِحْرُس نْواطير
تِسْعين شو تِسْعين يا بو الياس
عَ مْحَبّتَك.. والله قليله كْتير
وْلاد عمّي تاكيين الراس
وعيلة بعيني لفّها التعتير
محبوب كنت.. سآل كل الناس
عم يحلُف بْإسمك كْبير زْغير
يا شمعة الْـ ما بتنطفي بقدّاس
يا صورة الـ مُش لازما تِبْخير
يا سْراج مِضوي بْدَير مار الياس
يا جار عدرا اشْتاقت التنوير
بمجدليا اليوم دقّوا جْراس
وصار الحزن ع بيادرا قناطير
ـ3ـ
كيف بدّي ودّعَك قللّي
وكِنّا بْدينَيْنا صوتَك نَملِّي
الـ عَمّ اللي متلك صعب إنّو يْموت
تارك حَنانو بْقلبنا غَلِّه
هِنيّال قلبو فيك هالتابوتْ
هوّي الـ ربِِح ونحنا اللي خْسرناك
وْلازم نعيش العمر عَ ذكراك
وكل ما ذَكرنا إسمَك.. نْصَلّي

هناك تعليق واحد:

  1. محمود شباط11:40 م

    بو الياس عم الكل
    ...
    عمك يا شربل صار عم الكل
    حملنا معك عكتافنا همو
    وصرنا نجلو ودمعتك منجل
    من كل قلبي بقول ألله يرحمو

    أخي الحبيب شربل
    تفضل بقبول مواساتي برحيل عميد عائلتكم الكريمة المرحوم العم أبو الياس بولس بعيني. تغمده الله بواسع رحمته وأسكنه فسيح جنانه. أطال الله بعمرك وعمر محبيك.
    ودمت لمشارككم في المصاب الجلل : أخوكم محمود شباط

    ردحذف