وآخرتها شو؟

شعر شربل بعيني









ـ1ـ

.. وْآخْرِتْهَا شُو؟!
كَمْشِةْ عُمرْ مَرْقِتْ
وْبَعْدُو غْرَاب الْبَيْنْ
عَمْ يِنْفُض رْيَاشُو
بِبْلادْ ضَاعِتْ بَيْنْ
أَطْمَاعْ حَنَّا وْزَيْنْ
وِبْدَمّهَا اخْتَنْقِتْ!








ـ2ـ
. وْآخْرِتْهَا شُو؟!
وْأَطْفَالْنَا الْـ مِنْ حَقُّن يْنَامُوا
وْيِحْلَمُوا بِالنُّورْ
سَيْهَرُوا الدَّيْجُورْ
مِنْ كِتِرْ مَا انْضَامُوا
بِبْلادْ كلاَّ جُورْ
وْعَمْ تِرْتِمِي بِبْحُورْ
كذْب وْأَنَانِيِّه
وْصَفْقَاتْ مَالِيِّه
وْإِحْتِيَال وْزُورْ!!








ـ3ـ
.. وْآخْرِتْهَا شُو؟!
وْمَا ضَلّْ عِنَّا بَيْتْ
وَاقِفْ بِوِجّ الرِّيحْ
يِنْدَه عَلَى السِّكَّيْتْ:
يا رَيتْ رَسْمُوا زِيحْ
بَين الْكذبْ وِالْحَقّْ
ما كانْ ضَوِّي شْحِيحْ
وْلا كانْ حَيْطِي انْشَقّْ
" يا بَيْتنا الْمَشْلُوحْ عَ الطُّرْقَاتْ
وِتْشَرّدُوا حْبَابَكْ
وْعَ عَتْبِة بْوَابَكْ
حُبّ الْفَضِيلِه مَاتْ
وِانْطَمّ بِتْرَابَكْ
لَسْبِدّْ ما تِتْرَاجَع الأَيَّامْ
عَن ظُلمها الْمَقْصُودْ
وْتِتْغَيَّرْ بْإِسْم الشَّعبْ حُكَّامْ
قِرْفَان مِنْهَا الدُّودْ"..









ـ4ـ
.. وْآخْرِتْهَا شُو؟!
سَاعَه بْيِرْضَى فْلانْ
وْسَاعَاتْ بِيهاجِمْ
وْعَمْ يِحْترقْ لُبْنانْ
وْتِتْطَايَر جْمَاجِمْ
مُشْ عَارْفِينْ لْمِينْ؟!!
" جِيرانْ عاشُوا الْعُمرْ
عَ طُولْ مِتِّحْدِينْ
ما بْيِسْأَلُوا عَنْ دِينْ
دِينُنْ إِيمان وْفَخرْ
بِالأَرْز وِبْصِنِّينْ
لَكِنْ بِسَاعِةْ قَهْرْ
مِشْيُوا بْطَرِيقْ الْغَدْرْ
مَعْ زُمْرِة شْيَاطِينْ"








ـ5ـ
.. وْآخْرِتْهَا شُو؟!
الأيَّامْ تَرْكِتْنَا
بْبَحْر الْخَطِيِّه نْعُومْ
وْنِسْيِتْ عَ وِجَّا رْسُومْ
مِنْ وَهجْ ضِحْكِتْنَا
مِنْ لَوْن أَحْلَى غْيُومْ
مَرْقِتْ عَ تَلِّتْنَا
" افْتَكْرِتْ سْيُول الْحقْدْ
مْنِ زْمَانْ جَرْفِتْنَا
وْجَرْفِت حْرُوف الْمَجْدْ
مِنْ فَوْق صَفْحِتْنَا!!"









ـ6ـ
.. وْآخْرِتْهَا شُو؟!
وْبَعِدْنَا بْلُبْنَانْ
مْنِنْحِنِي لِفْلانْ
وْمِنْأَلِّه فْلَيْتَانْ
وِنْدُورْ بِمْدَارُو
الإِنْسَانْ أَللَّـه أَوْجَدُو إِنْسَانْ
تَا يِرْفَع شْعَارُو
وِيْمَجّدُو هُوِّي
وَحْدُو إِلَه الْحُبّ وِالْقُوِّه
الْـ مِنْ نَفْخِتُو بْيِلْوِي
أَكْبَرْ زَعِيمْ.. وْمِنْ هَوَا غْبَارُو
بْيِتْطَايَرُوا نْفَارِيتْ.. أَنْصَارُو










ـ7ـ
.. وْآخْرِتْهَا شُو؟!
ما عَادْ فِينَا دَمّْ
عَ كِتِرْ ما تْعِبْنَا
وْزَادِتْ مَصَايِبْنَا
ضِعْنَا بْزَاوَايَا الْعَتْمْ
لا الشَّمْسْ بَعْدَا شَمْسْ
وْلا نُورْهَا بْيِلْمَعْ
حَتَّى غْنَانِي الأَمْسْ
بِالْكَادْ نِتْسَمَّعْ
صِرْنَا عْذَاب النَّفْسْ
وْصِرْنَا التّنْهِيدَاتْ
وْلَوْلا مَرَقْ شِي عرْسْ
مِنْخَزِّق الزِّيناتْ






ـ8ـ
.. وْآخْرِتها شُو؟!
وْنِحْنَا اللِّي عَمْ نِخْسَرْ
هَـ الأَرْضْ وِالأَحْبَابْ
اللِّي تْحَوّلُوا لِتْرَابْ
كِرْمَالْ يِتْمَخْطَرْ
فَوْقُو الزَّعِيمْ السَّافِل النّصَّابْ
يَللِّي بْتِمُّو نْيَابْ
بِتْقَرْقِط الْخَنْجَرْ








ـ9ـ
يَا رَيْت فِيِّي خَلِّص بْلادِي
مِنْ كِلّ آلامَا
وْتِدْجِيلْ حُكَّامَا
وْتبْوِيسْ الأْيَادِي
وْيَا رَيتْ فِيِّي إِشترِي بْدَمِّي
أَمْن الشَّعبْ كِلُّو
وْبَدْل "الْعَشِيرِه" يْقَدِّس "الأُمِّه"
وِيْوَحِّد الْكِلْمِه
وْما يْعُود يِقْدِرْ جَيْش يِحْتَلُّو






ـ10ـ
.. وْآخْرِتْها شُو؟!
قْرِفْنَا الْحَكِي يَا ناسْ
قْرِفْنا الشِّربْ وِالْكاسْ
قْرِفْنا الْمَحَبِّه وِالزَّهرْ
قْرِفْنَا نْأَدِّنْ بِالْفَجْرْ
أَوْ نِحْضَر الْقدَّاسْ
قْرِفْنَا نْكَمِّلْ هَـ الْعُمرْ
الْخَالِي مْنِ الإِحْسَاسْ.

هناك 5 تعليقات:

  1. د. عبدالله عقروق . فلوريدا3:57 م

    هنالك شيطانان لا ثالث لهما في لبنان
    جعجع ، وعون ، بدهم يبدلوا الأرزة بنجمة داوود
    الشر بطاير من عيونهم ، وغير مصلين عالمسيح
    اقسما بتقسيم لبنان ، وتفريق شعبه بمسلمية ومسيحيه
    وجعجع عما ببني ماليشياتوه حتى يجر لبنان لحرب اهلية
    وعون بده يحكم لبنان كأنها تكيه ورثها عن الأباء وألأجداد
    قسما وحدة الموارنه ، والكلمة ما عادت لبطريك بكركي
    اطردوهما يا لبنانين ، وشوفوا كيف برجع السلام والوئام

    ردحذف
  2. غير معرف11:38 م

    قصيدة جميله جدا يا شربل يا أستاذ .. بتفلفش جروحنا للشمس وللريح وبأصبعك بتأشر عالوجع ..بس لامنشوف ولامنسمع ولامنحس ..متل القطيع يللي دخلت فيه أرواح شريره من الخنازير ..وعمنركد تنوقع بالبحر كلنا سوى ..

    شكرا

    ايادق

    ردحذف
  3. اليوم انبسطت كتير ــ مع إني من زمان ما عم لاقي شي يبسط ــ وزعلت كتير
    انبسطت لأني وصلت لهون وما بعرف كيف وصلت
    وزعلت لأني ما وصلت لهون من زمان
    معقول يكون في شاعر متل شربل بعيني وأنا ما بعرفو لليوم؟
    ..
    ..
    ..

    شربل أنا بحبك
    وبيجوز دربي غير عن دربك
    ولو تناقرنا بإشيا كتير
    واختلفنا بوجهة التفكير
    رح ضلني بحبك
    ما دام عم تحمل هموم الناس
    بها الخافق العم ينبض بعبك..
    ..
    ..

    شربل ... حبيبي ... يحفظك ربك
    ****
    حطيتك براسي
    ورح برجع لعندك كتير

    دمت أيها المتنفس شعرا
    ..
    ..
    محمد المقهور

    ردحذف
  4. غير معرف9:59 ص

    Thank you Mohamad,
    I am not in my office..
    sorry because I am writting in English.
    God bless you.
    Charbel

    ردحذف