مسرحية: خلصت اللعبه

خلصت اللعبة

مسرحية كاريكتورية غنائية سياسية ساخرة

تأليف شربل بعيني

**************************************

الأشخاص

سعدى

عادل
نعّوم
زعيم الشير
بدر بك وأزلامه
فخر بك
عازف البوق
رئيس الجلسة
الشاويش والفرقة العسكرية
فتاة الكرسي
زعيمان مربوطان بزعيمين آخرين
زعيمان يحملان المباخر
قناصل الدول
الصحفيون
بائعو الجرائد
أهالي الشير
********************************

الفصل الأول

(ساحة بلدة الشير. تدخل سعدى وبيدها زهرة العشّاق)

سعدى

ـ1ـ
هَـ الْقِصَّه قِصِّةْ ضَيْعَه مَقْطُوفِه مْنِ النَّجْمْ
مَرَّه بِتْزَهِّر وْمَرَّه بِتْضِيع بْـهَالْعَتْمْ
وْكلّ سِتّ سْنِين بْيِنْتِخْبُوا مُخْتَارْ
وِبْيِنْسَمّ الْجَوّْ وِبْيِتْقَلْ الِعْيَارْ
ـ2ـ
وِاللَّيْلِه، يَا حَسْرَه، مَوْعد اللّعْبِه
الْكلّ بْيِغْتِنْيُوا وْمَا بْتِفْضَى جَيْبِه
إِلاَّ جَيْبِتْنَا نِحْنَا هَـ الْفُقْرَا
وْيَا رَبّ احْرِسْنَا تَا نْضَلّ لْبُكْرَا

(بعد الإنتهاء من الغناء، تبدأ بنتف أوراق الزهرة)
بِيحِبّنِي؟
مَا بِيحِبّنِي؟
بْيِرْجَعْ عَ الضَّيْعَه؟
مَا بْيِرْجِعْ عَ الضَّيْعَه؟
أُفْ شُو هَـ الْحَالِه.. دَايْماً مْسَكّرَه بْوِجِّي
إِنْتِي مَعِي وِلاَّ ضِدِّي يَا هَـ الزَّهْرَه
عِتْقِت سْنِين العُمْر.. وْبَعْدُو حَبِيبِي غَايِبْ؟

نعوم
ـ1ـ
يَا زَهْرِة الْعشَّاقْ
رَاضِيهَا.. رَاضِيهَا
أُوعِي تْزَعّلِيهَا
قَلْبَا كْتِيرْ مِشْتَاقْ
ـ2ـ
قُولِيلاَ عَ طُولْ
حَبِيبِكْ بِيحِبِّكْ
جَايِي مْنِ الْمَجْهُولْ
تَا يِتْخَبَّى بْقَلْبِكْ
ـ3ـ
يَا رْفِيقِة الْحِلْوِينْ
يَا زِينِة إِيدَيْهُنْ
بِتْهَنِّي الْمَغْرُومِينْ
بْتِضَحَّكِي عْلَيْهُنْ

سعدى
أَللّـه يِسْمَعْ مِنَّكْ يَا نَعُّومْ
وْيِرْجَعْ يَللِّي بْحِبُّو مْنِ الْهجْرَانْ
ما أَصْعَب النَّطْرَه عَ الْمَغْرُومْ
بِيعَلِّقْ عْيُونُو عَ الْحِيطَانْ

أَهَالِي الشير
وَحْدَا الدَّبْكِه.. يَا نَعُّومْ
بِتْفَرِّحْ قَلْب الْمَغْرُومْ
وْبِتْخَلِّي سَاحِتْنَا تْطِيرْ
وِتْشَتِّي عَ الأَرْضْ نْجُومْ

نعّوم
ـ1ـ
دَبْكِه.. دَبْكِه.. دَبْكِه شُوف
الْحلْوِه نِزْلِتْ عَ الدَّبْكِه
فَوْق عْيُونَا جَوْز سْيُوفْ
وْنَقْلِة إِجْرَيْهَا بْتِحْكِي
ـ2ـ
رَقِّصْهَا نِتْفِه يَا عُودْ
وْطَيِّرْلِي شَعْرَاتَا السُّودْ
وْيَا دَفّ بْضَرْبَاتَكْ جُودْ
وْعَرِّقْلِي هَـ الدِّرْبَكِّه
ـ3ـ
الْتَفُّوا حْوَالَيْهَا الشَّبَابْ
وْلَفُّوهَا بْنَظْرِةْ إِعْجَابْ
وْلِمِّنْ طَلْبُوا مِنْهَا جْوَابْ
رَقْصِتْ عَ شْفَافَا الضِّحْكِه
ـ4ـ
تْصَبَّرْ يَا قَلْبِي الْمَقْهُورْ
السّاحَه فِيهَا عَم بِتْدُورْ
وْعَم بِيزَقِّفْلاَ الْجُمْهُورْ
وْهِيِّي بْخَصْرَا عَمْ تِتْكِي

(يدخل زعيم الشير.. يُخَاطِب الأهالي)

زعيم الشير
تَعَوْ.. تْعَوْ
يَا رْفَاقِي تْعَوْ
إِنْتُو يَا نجْمِة الصُّبْحْ
الْـ بِتْبِشِّرْ بِالضَّوّْ

أهالي الشير
إِنْتَ التِّمّ وْنِحْنَا الْكِلْمِه
وْلَوْلا التِّمّْ مَا فِي كِلْمِه

زعيم الشير
بْتَعِرْفُوا يَا كْبَارْ
يَا رْفَاق الْمِشْوَارْ
اللَّيْلِه عِنْدِي جَلْسِه
وْمُشْ عَارِفْ إِخْتَارْ
مُختار لْهَالْكِرْسِي

أهالي الشير
ما بْيِنْخَاف عْلَيْكْ
بْتِخْتَارْ اللِّي بْيِصْلَحْ
الصّدقْ بِـ عِينَيْكْ
وْبِمْحَبِّتْنَا مْسَلَّحْ

زعيم الشير
ـ1ـ
عَمْ إِتْلَقَّى ضْغُوطْ
مِنْ فَجّ وْغَمِيقْ
وِالْـ مَا بَدُّو يْمُوتْ
بْيِخْتِنِقْ خَنِيقْ
ـ2ـ
مْبَارِحْ جَانِي فَخْرْ
وْقَلِّلي انْتِخِبْنِي
وْرِجِعْ إِجَا بَدْرْ
وْحَاوَل يْطَبِّقْنِي
ـ3ـ
وْقِلْتِلّو لَـ بَدْرْ
شُو مَا قِلْت لْفَخْرْ
وْيَا حَسِرْتِي كْذِبْتْ
كِذْبِه بْهَـ الْعُمْرْ

أهالي الشير
كِذِبْتَكْ بَيْضَا
وْضِحِكْتَكْ بَيْضَا
مِتِل تَلْج بْلادْ
ما بْتَعْرِف الْفَوْضَى

سعدى
مَا قِلْتِلّنَا بْأَيَّا ضَيْعَه
بَدُّو يْصِيرْ الإِنْتِخَابْ

زعيم الشير
مَا قَالُولِي بْأَيَّا ضَيْعَه
كِل شِي قَالوا: السّاعَه سَبْعَه
وْعَ الْمَطْرَحْ.. مَقْفُول الْبَابْ

أهالي الشير
عَ الْمَطْرَحْ.. مَقْفُول الْبَابْ
مِنْ دُونْ مِفْتَاحْ وْبُوَّابْ

زعيم الشير
يَا أَهَالِي الشِّير
يَا أَهْلِي.. يَا مْحِبِّينْ
اجْتَمَعْنَا ضِهْرِيِّه
تَا تْقُولُولِي مِينْ
بِنْتِخِبْ عَشِيِّه

نعّوم
عِنْدِي عَيْلِه وْمُشْ قَادِرْ إِكْفِيهَا

سعدى
وْمِرْضِتْ أُمِّي وْمَا مَعِي دَاوِيهَا

نعّوم
بَدّنَا وَاحِدْ كَفُّو بَيْضَا
وِعْيُونُو بْتِطَلَّعْ
يْفُوتْ عَ الِبْيُوتْ
يِقْعُدْ بَيْن النَّاسْ
عَ حَكْيُنْ يِتْسَمَّعْ

سعدى
وْحَبِيبِي الْـ تَرَكْنِي
وْسَافَرْ بْهَالْكَوْنْ
وْبِالضَّيْعَه زَرَعْنِي
زَهْرَه مِنْ دُونْ لَوْنْ
حَابِبْ إِنُّو يْعُودْ
وْنَاطِرْ مِينْ يْرِدُّو
تا يِشْتِغِلْ بِأَرْضُو
الْـ هَجْرِتْهَا الزُّنُودْ

زعيم الشير
وْسَاعِتْهَا الضَّمِيرْ
بِيعِيش بْأَمَانْ
وِبْيِكْبَر الزَّمَانْ
الْـ بَعْدُو طِفْل زْغِيرْ

(يدبك الجميع دبكة فرح)

سعدى
ـ1ـ
فَتِّحْ يَا ضَمِيرْ.. فَتِّحْ يَا ضَمِيرْ
النَّاس اشْتَاقُوا عْلَيْكْ
عَ تِفْتِيحِةْ عِينَيْكْ
ما بْيِسْوَى تْنَام كْتِيرْ
ـ2ـ
بْهَالْعَصْر مَا فِي إِلاَّ
صَوْت الْمَصَارِي طَالِعْ
وْحكْم الدِّنِي كِلاَّ
لِلْفِي عِنْدُو مَصَانِعْ
جَوَاهِر وْحَرِيرْ
ـ3ـ
فِي كْتَارْ خِلْقُوا يْجِخُّوا
مْنِ الْجَخّ عِمْيُوا عْيُونُنْ
وِكْتَارْ خِلْقُوا يْنِخُّوا
تَا حَتَّى يْعَبُّوا بْطُونُنْ
مِنْ فَضْلِة الأَمِيرْ

(يخرج زعيم الشير. تدخل مجموعة من الفلاحين.. عادل يلتقي نعّوم)

عادل
سامِعْ أَوْ مَنَّكْ سَامِعْ
شُو عَمْ يِحْكُوا النَّاسْ
الْعَسْكَرْ بِسْلاحُو اللاَّمِعْ
جَايِي عَ ضَيْعِتْنَا
تَا يْخَيِّمْ بِسَاحِتْنَا
وِيْبَعِّدْ عَنْهَا النَّاسْ
قالْ فِي قَرَارْ
إِنُّو السَّاحَه تِفْضَى
تَا يِنْتِخْبُوا مُخْتَارْ
وْجَايِي شَخْصِيَّاتْ
مِنْ دُوَل بْعِيدِه
بْيِحْكُوا بِالْمِيَّاتْ
تَا يْرِدُّوا اللِّي حَادْ
مْنِ الرُّوس الْعَنِيدِه
وْقَالْ يِمْكِنْ تِعْلَقْ
وِيْصِيرْ فِي مَشَاكِلْ
وْيِتْكَسَّر الزَّنْبَقْ
عَ حْفَافي الْمَشَاتِلْ

نعّوم
وْلَيْش اخْتَارُوا الشِّيرْ
وْفِي بُلْدَان كْتِيرْ؟

عادل
بْحَيْث الشِّيرْ مْسَالِـمْ
لا بْيِحْكِي وْلا بْيِسْمَعْ
وْبِيضَلُّو يِتْطَلَّعْ

نعّوم
لكِنْ فِي قَانُون
وْفِي حُرْمِةْ بَلَدْ

عادل
بْيِتْطَبَّقْ الْقَانُونْ
وَقْت اللِّي مْنِتْخَلَّصْ مِنْ مَرَض الْحَسَدْ

نعّوم
وْحُرِّيِّتْنَا كِيف مْنِرْضَى تِنْدَاسْ؟

عادل
اسْآلْ بَاقِي النَّاسْ

نعّوم
مات الرَّايْ
وِانْتَحَر الْحَكِي
وْسَافَر الطَّيْرْ

عادل
وْشُو بْيِنْفَع الرَّايْ
وْشُو بْيِنْفَع الْحَكِي
بِبْلادْنَا.. وِالْكلّ
بَدُّنْ رِضَى الْغَيْرْ؟

(فتيات الشير يحملن جرار الماء، يسقين الفلاحين)

الفتيات
الْعَوَافِي

الفلاّحون
أَهْلاَ بِالْحِلْوِينْ
أَهْلاَ بِالشَّلْحَات الْحُمْرْ
وِبْرَمْز اللَّطَافِه

الفتيات
كِيف الْهِمِّه.. انْشَاللّـه مْنِيحَه؟

الفلاحون
كِنَّا تِعْبَانِينْ
وْلِمِّنْ شِفْنَاكُنْ طِلَّيْتُو
حِسَّيْنَا بِالرَّاحَه

سعدى
إِسِمْكُنْ مَحْفُورْ عَ جبْهة الْخَيْرْ
يَا زْنُود الْقَوِيِّه الرِبْيَانِه عَ الْحُبّْ
بْتِزْرَعُوا الْحَفَافِي الْـ مَا بْيُوصَلاَّ طَيْرْ
تَا يِشْبَعْ جُوعَان وْيِتْضَحَّكْ شِي قَلْبْ

عادل
ـ1ـ
حَاكِينِي حَاكِينِي يَا زَهْرِة الْقَصَبْ
يَا صُورَه مَرْسُومِه عَ وَرَق الشَّجَرْ
كَتَبْتِكْ قَصِيدِه وِالشِّعْر اللِّي انْكَتَبْ
ضَايِعْ بِـ هَاللَّيْلْ وْما عَادْ لُو أَثَرْ
ـ2ـ
ضِحْكِتْلِي الإِيَّام وْقَطَفْنِي الْهَوَى
وْقِلْتِلِّك: لْوَيْنْ.. حَاكِينِي شُو بِكِي؟
لا تِقْسِي عَ الْجُرْح وْبِعْيُونِك الدَّوَا
الْجُرح الْـ بِشْكِي مِنُّو بْيِتْدَاوَى بِالْحَكِي
ـ3ـ
وِالسَّمَا الْمضْوِيِّه بِقْنَادِيل الْمَسَا
عْيُونِكْ يَا صَبِيِّه نَسِّتْنِي الْقَنَادِيلْ
خَايِف لَـ يِنْسُونِي وْخَطِيِّه إِنَّسَى
وْيِرْمُونِي بْخَبْرِيِّه خَبَّرْهَا الْمُسْتَحِيلْ
ـ4ـ
يَا رَيْتْ بِقْدِرْ سَكِّرْ بْوَابْ الْعِتَابْ
وْأُوقَفْ عَ نِصّ الدَّرْبْ وِالدِّنْيِي غيَابْ
وْقِلِّكْ: أَنَا لَوْلا عْيُونِكْ مُشْ أَنَا
وْلَوْلا وْجُودِكْ هَـ الْعُمرْ كلُّو عَذَابْ

( تدخل الفرقة العسكريّة.. تحاول إخراج الناس من الساحة)

الشاويش
بِمَا إِنُّو السَّاحَه
مْهِمِّه كْتِيرْ
اسْتِوْلَيْنَا عَ السَّاحَه
يَا أَهَالِي الشِّيرْ
مَمْنُوعْ الْمُرُورْ
مَمْنُوع الْوُقُوفْ
ومَمْنُوع التِّزْمِيرْ

سَعْدَى
أَنَا بَيْتِي حَدِّ السَّاحَه
وْطَرِيقُو بْتِمْرُقْ بِالسَّاحَه
يِعْنِي بْسَكِّرْ بَيْتِي؟

الشاويش
خُدُولْكُنْ شِي نِتْفِةْ رَاحَه
مَجْبُورِينْ نْفَضِّي السَّاحَه
قَبْل السَّاعَه سِتِّه

سعدى
مُشْ مَعْقُولْ

الشاويش
هَيْدَا أَمْرْ
وِاللِّي بِيخَالِف الأَمْرْ
مْنِحِبْسُو عَ طُولْ

إمرأة
يَا أَفَنْدِي أَنَا حِرْمِه
خِتْيَارَه.. وْمَا عِنْدِي هِمِّه
وْمَوْصِفْلِي شُوفْ وجِهْ رَبِّي

الشاويش
يَا سِتِّي حِنَّنْتِي قَلْبِي
وْقَلْبِي آلِه بْإِيدْ السُّلْطَه
وِالسُّلْطَه بِتْدِيرْ الآلِه
لَـ آخِر اللّعْبِه

(يدخل زعيم الشير.. يقترب من الفرقة العسكرية.. يتجمهر الناس حوله)

زعيم الشير
كِيف الْوَضْع.. انْشَاللَّه هَادِي؟

العسكر
قِلِّةْ مَا منِسْمَعْ أَخْبَارْ
وْنِحْنَا وِالْحَكِي أَعَادِي

زعيم الشير
وْمِينْ الْـ بَعَتْكُنْ عَ الشِّيرْ؟

العسكر
بَعَتْنَا اللاّزِمْ يِبْعَتْنَا
تَا نْحَافِظْ عَ الأَمْنْ

زعيم الشير
وْشُو بْتِعْتِقْدُوا يْصِيرْ؟

العسكر
مَا مْنَعْرِف.. هَايْ مُشْ شَغْلِتْنَا
شَغْلِتْنَا بِالأَمْنْ

( أهالي الشير يثورون. يحتجون. يتحركون بانفعال )

أهالي الشير
انْجَرْحِت الْحُرِّيِّه
انْجَرْحِت الْحُرِّيِّه
وِانْبَحّ صَوْت الشَّعْبْ

زعيم الشير
شُو الْقِصَّه قُولُولِي
تَا الْحُرِّيِّه مَخْجُولِه
وْمِرْمِيِّه عَ الدَّرْبْ؟

أهالي الشّير
هَـ الضَّيْعَه ضَيْعِتْنَا
وْمَنْعُونَا بِـ سَاحِتْنَا
نِمْشِي.. نْغَنِّي وِنْطلّْ

زعيم الشير
رَح حاوِلْ إِقْنَعْهُنْ
عَ الهَدَا.. وْفَهّمْهُنْ
إِنُّو السَّاحَه لِلْكِلّْ

( يقترب زعيم الشير من الشاويش. يتجادل معه. الشاويش لا يقتنع)

عادل
حِلاَّ يَا شَاوِيشْ

الشاويش
مَا بْتِنْحَلّْ

سعدى
طَرِّيهَا يَا شَاويش

الشاويش
مَا بْتِنْحَلّْ

نعُّوم
وْلَنُّو شِي سَاعْتَيْنْ
تَا نْمَلِّي مْنِ الْعَيْنْ

الشاويش
ما بْتِنْحَلّْ

زعيم الشير
حِلاَّ يَا شَاوِيشْ
طَرِّيهَا يَا شَاوِيشْ
وْلَنُّو شِي سَاعْتَيْنْ
تَا يْمَلُّوا مْنِ الْعَيْنْ

الشاويش
ما بْتِنْحَلّْ

زعيم الشير
شُو بَاكْ مْرَوْكَبْ عَ فَرْدْ كِلْمِه ؟

الشاويش
ما بْتِنْحَلّْ

زعيم الشير يستعمل تلفونه النقّال.. يتّصل بالمراجع العليا
يعطي التلفون للشاويش

الشاويش
أمرك سيدي.. طَيِّبْ سِيدِي.. بْخَاطْرَكْ سِيدِي
إِلَى الأَمامْ سِرّ

زعيم الشير
الشَّاويش قَلْبُو طَيِّبْ، أَخَّرْ تِنْفِيذ الْقَرَارْ سَاعَه.. كْرَامِة عْيُونْكُنْ

(يهلّل الشعب.. يرقص)

سعدى
ـ1ـ
قَالُوا ابْتَدَى يَوْم الْفَرَحْ
وِالْحُزن خَزَّقْ بَدْلِتُو
وِالطّفل مَطْرَحْ مَا انْجَرَحْ
دَاوَى الْجرح بِـ ضِحْكِتُو
ـ2ـ
قَالُوا الْعَتمْ فَلّ وْرَحَلْ
قِلْنَا الْعَتمْ مَا لُو مَحَلّْ
بَدْر السَّمَا الْيَوْم اكْتَمَلْ
غَنُّوا يَا نَاس لْطَلِّتُو
ـ3ـ
نِحْنَا إِذَا جَار الْقَدَرْ
مَرَّه عَلَيْنَا وِانْتَصَرْ
لا تْفَكِّرُوا مْنِتْرُكْ أَثَرْ
مِنْ عَيْلِتُو وْذِرِّيِّتُو
ـ4ـ
جِينَا وْعَ صَخْرَات الدِّنِي
لْقِينَا التَّوَاضُعْ مِنْحِنِي
بْنِينَا قَصرْ مَا بْيِنْبِنِي
لَوْ مَا إِيدَيْنَا بِنْيِتُو

(صوت بوق. يدخل فخر بك وبرفقته عازف بوق)

فخر بك
زَمِّرْ.. شُو بَاكْ وِقَّفْتْ؟
الْمُوسِيقَى مَغْنَاطِيس بْتِجْلُبْ النَّاسْ لِلْمَا عِنْدُو نَاسْ؟

عازف البوق
يا فَخرْ بَيْكْ
صَرْلَكْ طُولْ الدَّرْب تْقِللِّي زَمِّرْ وِنْفُوخْ تَا قْطَعْتِلِّي حَيْلِي

فخر بك
طَيِّبْ.. عَرِّفُنْ عْلَيِّي
بَسّ انْتِبِه لَـ تِغْلَطْ شِي غَلْطَه وِتْجَرِّصْنِي

عازف البوق
أَللَّـه مَعْكُنْ

أهالي الشير
خَيْر انْشَاللَّه.. أَمْرْ

عازف البوق
حَضِرْتِي.. لأْ.. حَضِرْتُو الزَّعِيمْ
اللِّي صُورْتُو مَرْسُومِه عَ لَوْحة الصَّدْرْ

أهالي الشير
أَهْلاَ وْسَهْلا بْكلّ الزُّعَمَا

عازف البوق
بَيُّو كَانْ سَفِيرْ
لَوْلا أَتْعَابُو الطَّرِيقْ مَا وِصْلِتْ عَ الشّيرْ

أهالي الشير
مْنِشْكُرْ بَيُّو وْكِلّ الْعَيْلِه

عازف البوق
وْيِمْكِنْ بَدُّو يْصِيرْ
بِالْمِسْتَقْبِلْ
شِي مِتْمَوِّلْ
أَوْ شِي.. وَزِيرْ

أهالي الشير
أَللَّـه الْعَاطِي

عادل
تْفَضَّلْ كِرْسِي

فخر بك
مَمْنُونَك كْتِيرْ
كِنَّا مْنِتْعَبْ لَوْلا الْكِرْسِي

عازف البوق
سْمِعْنَا إِنُّو التَّجَوُّلْ مَمْنُوعْ
وِالْحَالِه مَنْحُوسِه وْيَوْمِيِّه بْيُوقَعْ شَرّْ
تَارِي الْقِصَّه كِلاَّ كِذْبِه
وْخَلْف الْكِذْبِه سِرّْ

فخر بك
خَلِّينَا بْصُلْب الْمَوْضُوعْ

أهالي الشير
مْأَكَّدْ عَ السَّفَرْ
عَشْعَشِتْ فِيكُنْ الْغَبْرَه
وْتَعَّبْكُنْ الْمَشِي

عازف البوق
حَضِرْتُو مَا صَابُو شِي
لَكِنْ عَ كِتْرِ التِّنْفِيخْ
مَحْسُوبْكُنْ نَشَّفْ زَلْعُومُو
مِتْل الْبَالِعْ سِيخْ

فخر بك
اسْأَلْهُنْ وَيْنْ بَدّنَا نِرْتَاحْ

أهالي الشير
عِنَّا بْيُوت زْغَارْ
وْمَسَاكِبْ وَرْد وْغَارْ
تْفَضّلُو عَ بْيُوتْنَا
الْمَفْتُوحَه لَيْل نْهَارْ
نِحْنَا مِنْ زَمَانْ
جِينَا لْهَالْمَكَانْ
وِكْتَبْنَا عَلَى بَابُو
يَا أَهْلا بِالزُّوَّارْ

فخر بك يغادر الساحة
صوت البوق يسبقه وأهالي الشير يتبعونه. سعدى تناجي حبيبها

سعدى
ـ1ـ
نَطَرْتَكْ يَا حَبِيبِي
عَ مْفَارِقْ اللَّيَالِي
مِتِلْ شِي غَرِيبِه
وْعَم فَتِّشْ عَلَى حَالِي
ـ2ـ
وِعْيُونِي الْمِسْوَدِّه
مِلْيَانِه بِالدَّمْعْ
وِالدَّمْع الْـ عَ خَدِّي
جَامِدْ مِتْل الشَّمْعْ
وِحْبُوب الدَّوَالِي
ـ3ـ
وِالْعَتْم الْـ عَمْ يِزْحَفْ
عَ قْلُوب الأَحِبَّه
وِصْل لْعِنْدِي وْوَقَّفْ
وَينْ بَدِّي إِتْخَبَّى
مِنْ عَتْم اللَّيَالِي؟
ـ4ـ
نَطَرْتَكْ.. وِالطَّرِيقْ
عَمْ تِطْوَل وْتِطْوَلْ
وْهَـ الْقَلْب الْغَرِيقْ
مُشْ قَادِرْ يِتْحَمَّلْ
هجْرَانَكْ يَا غَالِي

عادل
يَا سَعْدى حْبَال الْحَنِينْ
مَا بْتِنْشُلْ غَرِيقْ
صَرْلُو مْسَافَرْ خَمْس سْنِينْ
وْبَعْدِكْ عَ الطَّرِيقْ

سعدى
قَوْلَكْ رَح بِتْصِيرْ وْعُودُو
غَيْم وْهَبِّة رِيحْ

عادل
وْعَتْمِه سَوْدَا خَلْف جْرُودُو
عَمْ تِعْوِي وِتْصِيحْ

سعدى
يِعْنِي رَاحْ؟

عادل
وْشَمَّعْ خَيْطُو

سعدى
لا تْبَغِّضْنِي فِيهْ

عادل
يَا خْطَيْتُو قَلْبِكْ يَا خْطَيْتُو
ناطِرْ تَا يْلاقِيه

(سعدى تقترب من عادل وهي خائفة)

سعدى
عادِلْ

عادل
شُو فِي يَا سَعْدَى؟

سعدى
شَايْفِه نَاسْ

عادل
وْسَامِعْ صَوْتْ

سعدى
وصْلُوا النّاسْ

عادل
وْقوِي الصَّوْتْ

(بدر بك وأزلامه.. الأسلحة ظاهرة بأيديهم)

الأزلام
ـ1ـ
بَدرْ بَيْك لا تِهْتَمّْ
عِنْدَكْ زِلْـم بْتِشْرَبْ دَمّْ
ـ2ـ
بَدرْ بَيْكْ.. بَدرْ بَيْكْ
كلّ الْعَالَـمْ لَـ عِينَيْكْ
ـ3ـ
بَدرْ بَيْك نِيَّالَكْ
بِتْرَبِّي الْهَوْل رْجَالَكْ

عادل
يَا إِخْوَانْ.. عَ رَوَاقْ
هَـ الضَّيْعَه هَنِيِّه
وْمَعْقُول الرَّدِيِّه
تْوَلِّدْ مَشْكَل وِخْنَاقْ

أحد الأزلام
انْقِبْر سْكُوتْ
حَكْيَكْ مُرّ مَا بْيِنْطَاقْ

عادل
عِيفُونا مْن التَّعَدِّي

أحد الأزلام
نِحْنَا خْلِقْنَا الْمَرَاجِلْ
وْمُشْ صَعْب عْلَيْنَا نْقَاتِلْ

سعدى
هَدِّي انْكَنَّكْ بِتْهَدِّي

عادل
لا يا سَعْدى

أحد الأزلام
تْرِكْهَا تْصَرِّخْ
وَاللَّـه هَـ الضَّيْعَه لَـ نْدَوِّخْ

سعدى
عِنَّا رْجَالْ
كَانُوا.. وْرَحْ يِبْقُوا أَبْطَالْ

أحد الأزلام
لْسَانِكْ أَطْوَلْ مِنْ حِرْبَايِه

عادل
شَايِفْ رَحْ تِكْبَرْ الِحْكَايِه

سعدى
هِمِّتْكُنْ يَا رْجَالْ الشِّيرْ

أحد الأزلام
رْجَالِكْ يَا بِنْت صْرَاصِيرْ

يدخل أهالي الشير، يقع اشتباك استعراضي موسيقي صاخب بين أهالي الشير وأزلام بدر بك
يدوم الاشتباك فترة من الوقت ثـم تنطفىء الأنوار

***************************************

الفصل الثاني

بائعو الجرائد يرقصون بجرائدهم
أهالي الشير يلبسون الثياب السوداء علامة الحزن
الأهالي صامتون والبائعون فرحون

البائع الأول
جَرَايِدْ.. جَرَايِدْ
بْحَادِثْ ضَهْر الشِّيرْ
رَاحْ خَمْس قِتْلَى
وِانْجَرَح كْتِير

البائع الثاني
جَرَايِدْ.. جَرَايِدْ
بْحَادِثْ ضَهْر الشِّيرْ
عَشْرَه مَاتُوا.. وْسِتِّه انْجَرْحُوا
وِالوَضِعْ خَطِيرْ

البائع الثالث
جَرَايِدْ.. جَرَايِدْ
بْحَادِثْ ضَهْر الشِّيرْ
سَبْعَه قِتْلُوا.. وِاللِّي انْجَرْحُوا
عَدَدْهُن كْبِيرْ

البائعون
ـ1ـ
جَرَايِدْنَا
بْتِنْقُلْ خَبْرِيَّاتْ
وْبِتْأَلِّفْ خَبْرِيَّاتْ
وْبِتْبِيعْ بِالْمِيَّاتْ
ـ2ـ
جَرَايِدْنَا
عَنْ حُرِّيِّةْ ضَمِيرْ
بْتِحْكِي الْـ بَدُّو يْصِيرْ
وْبِتْسَانِد الْفَقَيرْ
وْمَا بْتِقْبَضْ مِصْرِيَّاتْ

البائع الأول
يَا حلْوِه.. سَعِيدِه
اشْتِرِيلِكْ جَرِيدِه
أَحْسَنْ مَا الْجَرِيدِه
تْنَامْ وْتِصْحَا عَ إِيدِي

البائع الثاني
وَيْنَكْ يَا حَبُّوبْ
خِدْلَكْ شِي جَرِيدِه
وْبَسْ تِقْرَا الْمَكْتُوبْ
بْدِلْهَا بْوِحْدِه جْدِيدِه

البائعون
جَرَايِدْنَا
مَا بْتِلْعَبْ هَيْك وْهَيْكْ
وْلا بِتْسَاوِم عْلَيْكْ
وْلا بْتِنْزَعْلَكْ عِينَيْكْ
قْرِيهَا بْلا عْوَيْنَاتْ

تدخل الفرقة العسكرية ومعها قفصان كبيران
تركّز القفصين في طرف السّاحة. تُدخل إليهما عادل وسعدى
يهرب الناس والبائعون من الساحة

الشاويش
بِما إِنُّو الضَّيْعَه ما فِيهَا حْبُوسَاتْ
قِرَّرْنَا نِحْبِسْكُن بْهَالْقَفَصَينْ
وِنْشَدِّد الْحِرَاسِه عْلَيْكُنْ لَـ بَيْنَمَا يِنْتِهِي الإِنْتِخَابْ
وْتِمْرُق الْحَالِه عَ خَيْرْ

سعدى
ضَاع الْعَدْلْ

عادل
مات الْعَدْلْ

سعدى
وْمَرْمَغُولُو وِجُّو بِتْرَاب الْمَقَابِرْ

عادل
يَللِّي تْعَدُّوا عْلَيْنَا فِلْتُوهُنْ
وْنِحْنَا كَمْشُونَا الْعَسَاكِرْ

الشاويش
خَفِّفْ صَوْتَكْ.. الْعَالَـم نَامُوا

سعدى
قَوِّي صَوْتَكْ
وْخَلِّي النَّاس الْـ نَامُوا يْقُومُوا

عادل
ضَاع الْعَدْلْ

سعدى
مات الْعَدْلْ

الشاويش
بَلا حَكِي.. وْإِذَا حْكِيتُوا
رَحْ إِمْنَع عَنْكُن الأَكْلْ

سعدى
بَدِّي شُوف إِمِّي وْبَيِّي..

الشاويش
مُشْ مَسْمُوح يَا صَبِيِّه

عادل
وْشُو عِمْلِتْ دَخْلَكْ هَـ الْبِنْتْ؟

الشاويش
بِالتِّحْقِيقْ ذَكْرُوهَا
وْصَدَر الأَمْر وْحَبْسُوها
قَالُوا: تْعَدِّتْ عَ الْبَيْكْ
وْكَانِت مِتِّكْلِي عْلَيْكْ
عْطَيْتَا الْعَصَا
هَجْمِتْ هِيِّي
هْجَمِتْ إِنْتْ
وْبَعْدَكْ عَمْ بِتْبَرِّي الْبِنْتْ؟

يوزّع الشاويش عساكره في مطارح مختلفة من الساحة
يدخل نعّوم متنكراً مع مجموعة من المصورين والصحفيين

نعوم
كيف الْمَارِدْ وِالْجِنِيِّه؟

عادل
ظَلْمِتْهُنْ كلّ الْخَبْرِيِّه

نعوم
وِالْخَبْرِيِّه مِينْ فَبْرَكْهَا؟
مِينْ خَبَّرْهَا
وْقَللاَّ: كُونِي بِالسَّهْرِيِّه؟

سعدى
يِعْفِي عَنَّكْ لا تِتْعِبْنَا
بْيِكْفِينَا هَمّ مْصَايِبْنَا

نعّوم
رُوقِي شْوَيِّه
يَا صَبِيِّه
الْقِصَّه حِرْزَانِه وْمُشْ نِتْفِه

سعدى
أُوعَا تْكَفِّي

نعّوم
وْإِذَا بِشَّرْتِك بْشَارَه
بْتِحْكِيلِي الْمَشْكَلْ كِيفْ صَارْ؟

سعدى
لا.. ما بَدِّي

نعّوم
عَنْ حِرْمِه بَيْتَا بِالْحَارَه
وْقِدّامْ بَيْتَا شَجْرِةْ غَارْ

سعدى
عَجِّلْ.. قُولْ

نعّوم
لا ما بَدِّي

سعدى
رُوقْ شْوَيّْ

نعّوم
مُشْ فَاضِيلِكْ

سعدى
حَسْنِه.. خْطَيّْ

نعّوم
حْكِيلِي إِنْتِي تَا إِحْكِيلِكْ

سعدى
لِمِّنْ بْيِنْهَان الرِّجَّالْ قِدَّام حِرْمِه بْتَعِرْفُو،
وْما بْيِطْلَع بْإِيدُو شِي، شُو بْتِنْتِظِرْ مْنِ الْحِرْمِه؟

نعّوم
تِهْرُبْ

سعدى
تِهْرُبْ؟!!.. لا يَا سِيدِي
لازِمْ تِشْلَحْ تَوْبْ اللُّطْف وْتِلْبسْ تَوْب الْخُشُونِه
وِتْدَافِعْ عَنْ شَرَفُو الْـ عَمْ يِنْدَاس بْسَاعِةْ ضُعْفْ

نعّوم
إِذَا الْكلّ عِمْلُوا هَيْكْ
مُشْ رَح تْضَلّ حِرْمِه بِالْمعْنَى الصَّحِيحْ

سعدى
لا تْخَافْ.. كِل ما شَتِّتْ الدِّنِي كِل ما قَرَّب الرَّبِيعْ أَكْتَرْ

نعّوم
وْنِيَّالْ قَلْبْ اللِّي بْتِجْمَع فْصُول السِّنِه كِلاَّ

سعدى
سَاعِتْهَا الرِّجَّالْ بِتْخِفّ هْمُومُو وْبِينَامْ مِرْتَاحْ

نعّوم
آخْ مِنِّكْ يَا مَرْتِي..

عادل
وْشُو بِهَا مَرْتَكْ؟

نعّوم
أَكْبَرْ مِشْكَلْجِيِّه
وِمْن الْمُسْتَحِيلْ يِمْرُقْ يَوْمْ مِنْ دُونْ مَا تِعْمِلْ شَرّْ
سَاعَه بْتِتْخَانَقْ مَع الْجِيرَانْ.. وْسَاعَه مَع الدِّكَّنْجِي
وْسَاعَه مَع الخِيَّاط.. وْسَاعَه مَعِي أَنَا

سعدى
إِذَا مِنْحطِلَّك شْوَارِبْ وْمِنْلَبّسَكْ شِرْوَالْ بِتْصِيرْ مِتِلْ نَعُّوم

نعّوم
مَا الِمْصِيبِه إِنِّي حْلَقْت شْوَارْبِي
وِقْلَعِتْ شِرْوَالِي، تَا إِنْسَى إِنِّي أَنَا نَعُّومْ

سعدى
يِخْرُبْ ذُوقَكْ.. عْمِلْتَا مَعِي يَا شِيطَانْ؟

عادل
وْكِيفْ سَمْحُولَكْ تِمْرُقْ؟

نعّوم
حْمِلْتْ وَرْقَه وْقَلَمْ، وْعِلَّقْتْ بْكِتْفِي آلِةْ تِصْوِيرْ
وْقِرَّبْتْ عَ زَعِيمْ وْصِرْتْ إِسْأَلُو عَنْ رَأْيُو بِالإِنْتِخَابْ
وْبَلَّشْ يِحْكِي.. يِحْكِي وْيِمْشِي.. وْأَنَا إِمْشِي
تَا وْصِلْنَا عَ السَّاحَه. سَاعِتْهَا تْرَكْتُو

سعدى
وْكِيف تْرَكْتُو؟

نعّوم
تْرَكْتُو عَمْ يِحْكِي مَعْ حَالُو

يقترب الشاويش من القفصين
يخاف نعّوم. عادل يغني كي يلهي الشاويش ويهرب نعّوم
يدبك العسكر دون أن يتزحزحوا من أماكنهم

عادل
ـ1ـ
مَهْمَا الرِّيحْ تِصْفُر بِالْبَرِيِّه
وِتْزِتّ الْخَوْفْ عَ شْطُوطْ السَّهْرِيِّه
لَـ غَنِّي وْصِيحْ
بِـ وِجّ الرِّيحْ
وْإِسْهَرْ وِاللَّيْل سِهْرَان بْعيِنَيِّي
ـ2ـ
مَهْمَا الْحُبّ يغْمُرْنِي بْرِيشَاتُو
وْيِكْتبْنِي حَرْف عَ صَفْحِةْ حَيَاتُو
مَا بِشْبَعْ حُبّْ
لَوْ دَاب الْقَلْبْ
وْقَالُوا: مِسْكِينْ شُو حلْوِه صِفَاتُو
ـ3ـ
مَا بِرْضَى كُون أُسْطُورَه وْرِوَايِه
وْيِحْكُونِي النَّاسْ لِوْلادُن حِكَايِه
أَنَا بَدِّي صِيرْ
نَغْمِةْ عَصَافِيرْ
تْبَشِّرْ النَّاسْ بِالْعِيدْ اللِّي جَايِي

(يدخل زعيم الشير. يلتف حوله الصحفيون والمصورون)

الصحفيون
كِيف.. وْلَيْشْ مَنْعُوا التَّجَوُّلْ بِالسَّاحَه؟
مِينْ بْيِطْلَع؟.. شُو بِيصِيرْ؟
وِالْحَالِه قَوْلَكْ مرْتَاحَه؟

(يتّجه زعيم الشير نحو سعدى وعادل)

سعدى
مِدْرِي صَارْ
الْحَقّ غْبَارْ
مِدْرِي غَطّ الْعَدْل وْطَارْ

عادل
وْمِدْرِي انْشَالْ
مْنِ الْعِرْزَالْ
الغصْن الْمَاكِنْ حَتَّى انْهَارْ

زعيم الشير
وْمِدْرِي الرِّيحْ
الْـ عَمْ بِتْصِيحْ
بَلْعِتْ حَجْرَه وْهَبِّتْ نَارْ

سعدى
وْهَيْك قَوْلَكْ بَدّنَا نْضَلّْ
نْسُورَا.. بِجْبَالا تِنْذَلّْ
مِتْل الْمَرْجُوحَه الْمَرْبُوطَه
بْكَعْب الْوَادِي وْرَاس التَّلّْ؟

زعيم الشير
كِنَّا.. وْهَلَّقْ بَدّنَا نِنْسَى
وْنِرْجَعْ نِبْدَا مْنِ الْبِدَايِه
بَدّنَا السَّاحَه تْرَجِّعْ عِرْسَا
وْبَدّنَا الْمَاضِي يْصِير حْكَايِه

(صوت بوق. يدخل فخر بك. يتجمّع حوله الصحفيون)

الصحفيون
كِيفْ.. وْلَيْشْ مَنْعُوا التَّجَوُّلْ بِالسَّاحَه؟

(يدخل بدر بك. يهرع الصحفيّون إليه)

مِينْ بْيِطْلَعْ؟!.. شُو بِيصِيرْ؟
وِالْحَالِه قَوْلَكْ مرْتَاحَه؟

يدخل أربعة زعماء مربوطين ببعضهم البعض
علامة الاتحاد والتضامن وهم يقفزون ويرقصون

الزعماء الاربعة
كِرْمَالْ الشَّعْب اجْتَمَعْنَا وِاتَّحَدْنَا
وِالْحَاسِدْ جَنّْ عَ كِتْرِةْ مَا بْيِحْسِدْنَا
وِحَّدْنَا الصَّفّ حَتَّى نِخْدُمْ مَصْلِحْتُو
عَ شَرْط يْضَلّْ غَامِرْنَا بِـ عَاطِفْتُو
وْمِنْ وَقْت لْوَقْت يْسَانِدْنَا وِيْأَيِّدْنَا

موسيقى وزغاريد. أربعة رجال يحملون كرسيّاً جلست عليه فتاة رائعة الحسن
وأمامهم زعيمان يبخّران، وخلفهم قناصل الدول
وبيد كل قنصل منهم مسّاسٌ طويل
العسكر والصحفيّون ينحنون للكرسي

العسكر والصحفيّون
نُوَّرْتِي.. نُوَّرْتِي
وِالْجَوّ عِطَّرْتِي
وْصَار الْحَكِي زْغَارِيدْ
وِقِفْنَا وْنَطَرْنَا
تَا يِضْوِي قَمَرْنَا
وْقَمَرْنَا رَحَلْ لِبْعِيدْ

الزعماء
انْحَنَيْنَا.. انْحَنَيْنَا
وْزَاغُوا عِينَيْنَا
وْمَلْوَى عِينَيْنَا دْمُوعْ
مِنْحِبِّكْ وِمْنِفْخَرْ
بِحُبِّكْ هَـ الأَكْتَرْ
مِنْ عَطَش الْقَلْبْ وِالْجُوعْ

القناصل
شْرِبْنَا مِنْ كَاسِكْ
وِحْمِلْنَا مِسَّاسِكْ
تَا نِنْكُزْ هَللِّي ضَاعْ
شِعَّلْنَا وْنَفَخْنَا
النِّيرَانْ.. وْطَبَخْنَا
تَا يَاكُلْ كِلْمِنْ جَاعْ

(يركّزون الكرسي قرب القفصين. الشاويش يطرد الصحفيين من الساحة)

الشاويش
لْبَرَّا.. لْبَرَّا.. طْلَعُوا لْبَرَّا

الصحفيّون
مُشْ رَحْ نِطْلَعْ.. لازِمْ نِبْقَى
نِحْنَا صَوْت الأُمِّه الْحُرَّه

حلقات تشاور بين الزعماء والقناصل
فتاة الكرسي تتكلّم مع سعدى وعادل

فتاة الكرسي
مَسَا الْخَيْرْ يَا جِيرَانْ

سعدى
مَسَا الْخَيْرْ.. كِيفِكْ إِنْتِي؟

فتاة الكرسي
تِعْبَانِه

سعدى
لَيْشْ وَيْنْ كِنْتِي؟

فتاة الكرسي
مَحْمُولِه عَ كْتَاف الإِخْوَانْ

سعدى
وكيف تْعِبْتِي؟

فتاة الكرسي
.. خَضْخَضُونِي
أَقْوَى طَلْعَه طَلَّعُونِي
وْأَصْعَبْ نَزْلِه نَزَّلُونِي
وْرِمْدُوا مْنِ الْغَبْرَه عِينَيِّي

عادل
بِالْحَقِيقَه

فتاة الكرسي
وْضجْرُوا مْنِ الْحَكِي دِينَيِّي
عَ كِتْرِةْ مَا وَشْوَشُونِي
إِشْيَا رْقِيقَه

عادل
بِالْحَقِيقَه

فتاة الكرسي
سِتّ سْنِينْ قَعْدُوا عْلَيِّي
وِاسْتِحْلَيّت يْرَيِّحُونِي
وْلَنُّو دْقِيقَه

عادل
بِالْحَقِيقَه

سعدى
إِنْتِي وْنِحْنَا يَا صَبِيِّه
رِمْيِتْنَا الْحَالِه الْمَلْعُونِه
بْأَصْعَبْ ضِيقَه

(بدر بك يطبّق فخر بك )

بدر بك
يَا فَخْرْ بَيْكْ.. إِذَا صَارْ الْحُلمْ يَقْظَه تْنَيْنَاتْنَا مْنِرْبَحْ

فخر بك
وْبَرْكِي مْفَاتِيحَكْ مَا فَتْحُوا الِبْوَابْ
وِنْطَرْنَا بِالْبَرْدْ عَ مْفَارِقْ الأَحْلاَمْ
الْعُمْر رَحْ يِسْبَقْنَا وِالْمَوْعد بْعِيدْ

بدر بك
لا تْخَافْ.. الْمَفَاتِيحْ جْدِيدِه
وِالآمِرْ أَمَرْ، وِالرّبحْ مَضْمونْ

فخر بك
طَيِّبْ.. إِذَا تْنَازَلْتِلَّكْ وِقْعَدْتْ إِنْتَ عَ الْكِرْسِي
أَنَا وَيْنْ بَدَّكْ تْقَعِّدْنِي؟

بدر بك
مَطْرَحْ ما بِتْرِيدْ.. عِنْدِي كْرَاسِي كْتِيرْ
الْكِرْسِي اللِّي بْتِسْتَحْلِيهَا حِطّ الطَّرْبُوش عْلَيْهَا

فخر بك
وِبْتِطْلِقْلِي إِيدِي؟

بدر بك
وْإِيدَيْنْ اللِّي حْوَالَيْكْ

فخر بك
هَلَّقْ صَارْ فِينَا نْقُولْ: اتَّفَقْنَا

(يتصافح الزعيمان. بدر بك يفتل شنبه ويتجه نحو الكرسي)

بدر بك
أَنَا لِكِي وْإِنْتِي لِي
خَلِّينِي إِقْعُد شْوَيّْ

(سعدى تهز قضبان القفص)

سعدى
هَيْدَا الْـ عِمْلِ الْمَشْكَلِه
وْخَلاَّ الإِخْوِه تِنْدُبْ خَيّْ

بدر بك
لا تْصَدّقِيهَا

سعدى
مْبَلّى هُوِّي
وْمُشْ عَمْ يِكِذْبُوا عِينَيِّي

بدر بك
رَحْ إِحْلِفْلِكْ

فتاة الكرسي
لا تِحْلِفْلِي
مَا بْتِعْنِينِي هَـ الْقَضِيِّه

بدر بك
مْبَيَّنْ مِتِّفْقِينْ عْلَيِّي؟

فتاة الكرسي
بِالصَّرَاحَه.. مَا فِيكْ تِقْعُدْ
إِلاَّ بْأَمْر الأَكْثَرِيِّه

بدر بك
الأَكْثَرِيِّه صَارِتْ مَعِي
وْبَدِّي إِقْعُدْ.. عَمْ تِسْمَعِي؟

عادل
حاجِي تِحْلَمْ

بدر بك
يَا مْسَاكِينْ
إِنْتُو بْإِيدِي مِتْلِ الْخَاتِـمْ

عادل
إِنْتَ مِينْ
حَتَّى تْهَدِّدْنَا يَا ظَالِـمْ؟

رنين جرس صغير. يدخل رئيس الجلسة
يقف الجميع. يجلس بدر بك عن يساره وزعيم الشير عن يمينه.
الزعماء الباقون يجلسون في الوسط

رئيس الجلسة
ابْتَدْيِت الْجَلْسِه
الْـ مَا فِيهَا أَسْرَارْ
تا نْقَعِّدْ عَ الْكِرْسِي
بْهَـ الْمَسا.. مُخْتَارْ

سعدى
ابْتَدْيِت الْجَلْسِه
الْمِلْيَانِه أَشْرَارْ
تَا تِتْعَبْ هَـ الْكِرْسِي
وْأَعْصَابَا تِنْهَارْ

رئيس الجلسة
جَلْسِتْنا مَكْشُوفِه
مِتِلْ شَمْس نْهَارْ
بِالصِّدقْ مَعْرُوفِه
وِبْحُسْن الإِخْتِيَارْ

سعدى
جَلْسِتْهُنْ مَلْفُوفِه
بِـ لَهِيب النَّارْ
بِالْكِذب مَوْصُوفِه
وِبْقِلِّة الدِّبَّارْ

رئيس الجلسة
يَا إِخْوَانْ.. بَعْد التَّشَاوُرْ والأَخِدْ وِالرَّدّ
بِقِي عِنَّا تْنَيْنْ مْرَشّحِين لِلْكِرْسِي
بَدِرْ بَيْك الْقَاعِدْ عَنْ يَسَارِي
وْزَعِيمْ الشِّيرْ الْقَاعِدْ عَنْ يَمِينِي

بدر بك
زَعِيمْ الشِّيرْ مُش مْرَشَّحْ
فِيك تْقِللِّي مِينْ رَشَّحْ زَعِيمْ الشِّيرْ؟

بعض الزّعماء
نِحْنَا

بدر بك
إِنْتُو..؟

بعض الزّعماء
أَيْوَه.. نِحْنَا

بدر بك
مَا عَ الِحْسَابْ اتَّفَقْنَا؟!! شُو نْسِيتُو الإِتِّفَاقْ؟
شُو نْسِيتُو الْمَفَاتِيحْ وِالْمَصَالِحْ الْمشْتِرْكِه؟

بعض الزعماء
مَصْلِحْة الْوَطَنْ فَوْق كِلّ الْمَصَالِحْ

بدر بك
بَلا مَصْلَحِةْ وَطَنْ بَلا بَلُّوطْ
كِلّ وَاحِدْ مِنْكُنْ عَمْ يِعْمل مَصْلِحْتُو
شُو مْفَكّرينّي وَلَد زْغِيرْ؟

فخر بك
رَاحِتْ عْلَيْكْ يا بَدْر بَيْكْ وْرَاحِت عْلَيِّي
مْفَاتِيحَكْ مْصِدَّايِه وْفَوْزَكْ مُشْ مَضْمُونْ
لازِمْ خَلِّصْ قْرُونِي مْنِ قْرُونَكْ

بدر بك
كَمَانْ إِنْتَ يَا بْرُوتُوسْ
إذَا فِيكْ تْخَلِّصْ قْرُونَكْ خَلِّصُنْ.. شُو نَاطِرْ؟
فَوْزِي مَضْمُون مِيِّه بِالْمِيِّه.. هَلَّقْ بِتْشُوفْ

رئيس الجلسة
يَا بَدرْ بَيْك بِتْرَجَّاكْ تِقْعُدْ تَا كَفِّي كَلامِي
حَدَا مِنْكُنْ بْيَعْرِفْ شُو كِنْتْ عَمْ قُولْ؟

(يتطلّع الزّعماء ببعضهم البعض ويهزّون رؤوسهم علامة النفي)

سعدى
كِنْتْ عَمْ بِتْقُول إنُّو هَـ الْمِشْكَلْجِي قَاعِدْ عَنْ يَسَارَكْ
وْزَعِيمْ الشِّيرْ قَاعِدْ عَنْ يَمِينَك

بدر بك
اخْرَسِي يَا بِنْتْ

عادل
مُشْ رَحْ تِخْرَسْ

رئيس الجلسة
خْرَسُوا كِلّكُنْ سَوَا تَا نْكَفِّي الْجَلْسِه
وْبَدّنَا مِنْ هَـ التّنَيْنْ نِنْتِخِبْ مُخْتَارْ
وْبِمَا إِنُّو بْلادْنَا بْلادْ حُرِّيِّه، بْلادْ دِيمُوقْرَاطِيِّه
بِطْلُبْ مِنْ كِلّ وَاحِدْ مِنْكُن يْشَاوِرْ ضَمِيرُو
وِيْقُومْ يِقْعُدْ حَدِّ الشَّخْص الْـ بِيرِيدُو
وْمِتِلْ مَا قِلْتِلّكُنْ: الْجَلْسِه مَكْشُوفِه وْمَا فِيهَا أَسْرَارْ

(يخيّم صمت عميق)

فتاة الكرسي
دَايْماً الْهُدُوء بْيِسْبَقْ الْعَاصْفِه

سعدى
قَوْلِك الْعَاصْفِه قَوِيِّه؟

فتاة الكرسي
حَسَبْ تَقَلُّبَات الطَّقْسْ

عادل
بَيْنِي وْبَيْنِكْ يَا كِرْسِي
إِنْتِي لَوْ خَيَّرُوكِي بَيْن هَـ التّنَيْنْ.. مِينْ بْتِخْتَارِي؟

فتاة الكرسي
أَنَا مَا بِخْتَارْ.. إِنْتُو اللِّي بْتِخْتَارُولِي

سعدى
نِحْنَا؟

فتاة الكرسي
أَيْوَه إِنْتُو.. وْمِتِلْ ما بِتْفَصّلُولِي بِلْبُسْ
أَوْقَاتْ بِتْلَبّسُونِي حَرِيرْ، وْأَوْقَاتْ جُوخْ، وْأَوْقَاتْ كِتَّانْ
وْمَا بْعُمْرِي اشْتَكَيْتْ
لأَنِّي مِتْأَكّدِه إِنُّو ضَمِيرْكُنْ رَحْ يِرْجَعِلْكُنْ
وِتْلَبّسُونِي التَّوْبْ اللِّي بْيِلْبَقْلِي

عادل
وْهَلَّقْ.. شُو بْتِعْتِقْدِي رَحْ نْلَبّسِكْ؟

فتاة الكرسي
صَدِّقْنِي مَا بَعْرِفْ.. إِنْتُو اللِّي لازِمْ تَعِرْفُوا
وْكُونُوا مِتْأَكّدِينْ إِنُّو الْخِيطَانْ الْـ عَمْ تِجْمَعُوها
كِلّ أَرْبَع سْنِينْ تَا تْحَيّكُولِي مِنْهَا تَوْبْ
إِذَا اخْتَرْتُوهَا مْنِ الأَصْلْ مَتِينِه
بْيِطْلَعْ التَّوْبْ مَتِينْ وْحلُو وْمُرِيحْ

ينقسم الزعماء. الزّعماء الأربعة يختلفون ويقطعون الحبل
خمسة مع بدر بك وأربعة مع زعيم الشير
رئيس الجلسة يشير بيده نحو زعيم الشير

رئيس الجلسة
نَتِيجِةْ هَـ الإِقْتِرَاعْ مُتْعَادْلِه.. خَمْسِه بْخَمْسِه
وِلْهَالسَّبَبْ بِطْلُبْ مِنْ كِلّ وَاحِدْ مِنْكُنْ يِرْجَع لْمَطْرَحُو
تَا نْعِيدْ الإِنْتِخَابْ

بدر بك
شُو باكْ يَا رَيِّسْ مَا بْتَعْرِف تْعِدّْ؟
أَنَا خِدْتْ خَمِسْ أَصْوَاتْ
وْحَضِرْتُو أَخَدْ أَرْبَعْ أَصْوَاتْ
وَاحِدْ، تْنَيْنْ، تْلاتِه، أَرْبَعَه.. مِينْ بِيكُونْ رِبِحْ؟

زعيم الشير
الظَّاهِرْ مَا شَافْ إِيدَكْ يَا رَيِّسْ

بدر بك
إِيدُو بَدَّكْ تْعِدَّا صَوْتْ.. لَيْكْ مِلاَّ زَعِيمْ لَيْكْ

رئيس الجلسة
يَا بَدرْ بَيْكْ.. أَنَا مِدَّيْت إِيدِي لَـ جِهِّةْ زَعِيمْ الشِّيرْ
يِعْنِي عْطَيْتُو صَوْتِي

بدر بك
الرَّئِيسْ مَا بِيصَوِّتْ.. الرَّئِيس بْيِقْعُدْ عَ الِحْيَادْ

رئيس الجلسة
وْمِينْ قَلَّكْ هَـ الْحَكِي؟
أَنَا مُنْتَخَبْ مِنْ قِبَل الشَّعْبْ تَا إِنْتِخِبْ مُخْتَار لْهَالشَّعْبْ

بدر بك
فِينِي إِحْكِي مَعَكْ كِلْمِه عَ رَوَاقْ

رئيس الجلسة
حْكِينَا كْتِيرْ يا بّدر بّيْكْ.. وْصَارْ لازِمْ نِنْتِخِبْ

بدر بك
كِلْمِه وْبَسّْ.. وَلَوْ يَا رَيِّسْ

رئيس الجلسة
تْفَضَّلْ

بدر بك
مَعِي تْشَاكْ بْمَلْيُونْ دُولارْ وْبَدُّو جَيْبِه تْدَفِّيهْ.. شُو قَوْلَكْ؟

رئيس الجلسة
جَيبْتِي مَبْخُوشِه صَرْلا زْمَانْ.. خَلِّيهْ بْجَيبْتَكْ بْيِدْفَى أَكْتَرْ

بدر بك
وْبِضْمَنْلَكْ مَعُو أَرْبَع سْنِينْ رْئاسِه

رئيس الجلسة
تْعِبْت كْتِيرْ مِنْ هَـ الْمَرْكَزْ، وْصَارْ بَدِّي إِرْتَاحْ

بدر بك
قِللِّي شُو عَطَاكْ زَعِيمْ الشِّيرْ
تَا إعْطِيكْ أَكْتَرْ مِنُّو بْعَشِرْ مَرَّاتْ

رئيس الجلسة
عَطَانِي صِدْقُو وْإِسْتِقَامْتُو

بدر بك
حَكِي فَارِغْ.. مَا فِي حَدَا مِنْكُنْ مُشْ قَابِضْ
كِلّكُنْ جُوعانِينْ ومُشْ عَارْفِينْ كِيفْ تْعَبُّوا بْطُونْكُنْ

رئيس الجلسة
الزَّمَانْ تْغَيَّرْ والْعَقْلِيِّه تْغَيَّرِتْ
وْصَارْ الْوَطَنْ أَهَمّ مْنِ الْكَرَاسِي وْأَغْلَى مْنِ الإِنْسَانْ
بِتْرَجَّاكْ تِقْعد مَحَلَّكْ تَا نْعِيدْ الإِنْتِخَابْ

(تدور عملية الإقتراع من جديد)

فتاة الكرسي
أُفْ.. دَخْلِكْ يَا صَبِيِّه بْتَعْرفِي تْغَنِّي؟

سعدى
وْشُو بَدِّكْ تَا غَنِّيلِكْ؟

فتاة الكرسي
شُو ما كانْ.. الِمْهِمّ يِمْرق الْوَقْتْ

سعدى
لِمِّنْ كِنِتْ طِفْلِه
وْمِنِّي الْوَردْ بِيغَارْ
زْعِلْت هَوْنِي نْهَارْ
وِهْرَبتْ مِنْ أَهْلِي
وْكَانْ فِي تَلِّه
وْقَمَرْ
يْنَامْ بِعْبَاب الشَّجَرْ
وْيِرْكَع يْصَلِّي
عَ حَفِّةْ نَهْرْ
وعَ خْدُود الزَّهْرْ
يِتْمَرَّى
شَافْنِي تْخِبَّيْتْ
بِحْقُول مُخْضَرَّه
غَابْ الْقَمَرْ.. حِسَّيْتْ
إِنُّو الْقَمَرْ قَللِّي
يَللاَّ طْلَعِي لْبَرَّا
وِرْكَضْت صَوْب الْبَيْتْ
الْغِرْقَانْ بِالْعَتْمِه
لْقيتْ عَ بَابُو
نَاطْرَه أمِّي
ضْحكتْ وِانْسِرَّيْتْ
وِبْحِضِنْهَا غِلَّيْتْ
وْقِلْتِلّهَا: يَمِّي
تِبتْ وِالْـ تَابُوا
مْنِ الزَّعَلْ.. مَا بْيِزْعَلُوا
وْسَاعِتَا طَلّ الْقَمَرْ
وِنْسِيتْ إِنِّي إِسْأَلُو
لَيْش الْبَشَرْ
بِتْزَعِّلُنْ كِلْمِه؟

تحتدم عمليّة الاقتراع
قناصل الدول يعملون على وخز بعض الزعماء بمسّاسهم
زعيم الشير يحصل على الأكثريّة

رئيس الجلسة
إِبْن الشِّيرْ
هُوِّي اللِّي انْتَصَرْ

بدر بك
ما بيصِيرْ

سعدى
لا تْعَانِد الْقَدَرْ

بدر بك
في تزْوِيرْ
وْفِي دَفِعْ مِصْرِيَّاتْ
وْفِي لِعِب بِالأَصْوَاتْ

سعدى
وْفِي أَهلْ وِبْنَيَّاتْ
فِرْحُوا لْهَالْخَبَرْ

بدر بك
بَدِّي طِيرْ
وْشَقْلِب الْغَيْمَاتْ
وْدَحْرِج النّجْمَاتْ
وْخَلِّي الزِّلْـمْ
يْثُورُوا بِالْمِيَّاتْ
وْيِنِبْشُوا السَّاحاتْ
وْيِزْرَعُوا الْخَطَرْ

(يخرج بدر بك ملوّحاً بيديه ومتوعّداً دون أن يلحق به أحد)

سعدى
دَخِلْكُنْ لْحَقُوه.. يِمْكِنْ يِعْمِلْ ثَوْرَه

عادل
لا تْخَافِي.. هَلَّقْ بِيفِشّْ مِنُّو لْحَالُو

(الزعماء الذين صَوَّتوا لبدر بك يضحكون عليه ويبخرّون لزعيم الشيرْ)

فتاة الكرسي
عَجِيبْ.. هَلَّقْ انْتَخْبُوا ضِدُّو وْهَلَّقْ صَارُوا مَعُو

يخرج أهالي الشير من منازلهم فرحين
الفرقة العسكريّة تحاول منعهم من الاقتراب من الساحة

نعّوم
لا تِمْنَعُونَا نْعَبِّرْ عَنْ فَرَحْنَا..
نِحْنَا صِرْنَا إِنْتُو وْإِنْتُو صرْتُو نِحْنَا

الشاويش
وِالإِيَّامْ اللِّي فَصْلِتْنَا عَنْ بَعضْنَا دِبْلِتْ بِالرُّوزْنَامَه

(الفرحة تعم الجميع)

نعّوم
ـ1ـ
يَا نسْر الْجَوّْ
عَلِّي.. وْلا تْخَاف الْغَيْمَاتْ
وْعَ حْدُودْ الضَّوّْ
غِطّ.. وْنَفِّضْ بِالرِّيشَاتْ
وِجّ الإِيَّامْ الْمغْبَرَّه
ـ2ـ
يَا صَوْت الرِّيحْ
الْـ عَمْ تِصْفُرْ بِـ دِينَيْنَا
رْسَمْنالَكْ زِيحْ
بَيْن الدَّمْع وْعِينَيْنَا
وْبَيْن الآهَاتْ الْمِحْمَرَّه
ـ3ـ
إِنْتَ مِنْ هَوْنْ
وَقِّفْ يَا مَجْد وْغَنِّي
صِيَّرْنَا الْكَوْنْ
جَنِّه.. وْنَاطُور الْجَنِّه
أَرْزَات الرَّبّ الْمخْضَرَّه

زعيم الشير يمسك بطرف فستان فتاة الكرسي
رئيس الجلسة يمسك بطرف قميص زعيم الشير
وهكذا دواليك حتى يمسك الجميع بأطراف قمصان بعضهم البعض
ويصبحوا كالحبل، ويخرجوا من الساحة، ما عدا الفرقة العسكرية

سعدى
وْلِكْ يَا عَمِّي.. شُو بِكُنْ رِحْتُوا وِنْسيتُونا؟

عادل
وْكِيفْ بَدِّكْ مَا يِنْسُونَا
وْإِجِتْهُنْ فُرْصَه مِتِل هَـ الْفُرْصَه تَا يِنْضَمُّوا لِلْحُكْمْ

الشاويش
اشْكرُوا أَللّـه اللِّي مِنْضَلّ نِحْنَا نِحْنَا
مَهْمَا تْغَيَّرْ نَاسْ عَ الْكُرْسِي

سعدى
وْدَخْلَكْ شُو الْفَرْقْ؟

الشاويش
الْفَرْقْ.. بَدَلْ مَا نِبْقَى هَوْنْ وْنِفْتَحِلْكُنْ الْبَابْ
تَا تْرُوحُوا عَ بْيُوتْكُنْ
كِنَّا مْسِكْنَا بْقُمْصَانْ بَعِضْنَا وْرِحْنَا مَعِ اللِّي رَاحُوا

سعدى
أَللَّـه يِنْصرْكُنْ أَللَّـه

عادل
يَا دِلّ الِبْلادْ الْـ مَا فِيهَا عَسْكَرْ

الشاويش
صَدّقُونِي هَـ الْقَفَصَيْنْ لِبْقُولْكُن كْتِيرْ
رُوح شِفْلَكْ شِي قَفَصْ وِزْرِبَا فِيهْ
هَيْئِتَا بِنْتْ حِلْوِه وْقَوِيِّه

عادل
حَاكِيهَا.. حَاكِيهَا.. بْبُوسْ إِيدَكْ
أَنَا كِل مَا لَمِّحْلاَ شْوَيْ وْفَاتِحَا بِالْمَوْضُوعْ بِتْقِلِّي
نَاطْرَه حَبِيبِي الْغَايِبْ

الشاويش
الْغَايِبْ غَايِبْ وِالْحَاضِرْ حَاضِرْ
وِالْمَتَلْ بِيقُولْ: عصْفُور بِالإِيدْ وْلا عَشْرَه عَ الشَّجْرَه
أَنَا رَاجِعْ عَ الْمَخْفَرْ وْتَارِكْلَكْ هَـ الْقَفَصَيْنْ هْدِيِّه
إِذَا كِنْتْ شَاطِرْ بْتِحْبِسَا بْوَاحِدْ مِنُّنْ.. إِلى الأَمامْ سِرْ

سعدى
ـ1ـ
خِلْصِت اللِّعْبِه
خِلْصِت اللِّعْبِه
وْنِحْنَا كِنَّا اللِّعْبِه بْإِيد اللاّعْبِينْ
مْنِتْعَب وْمِنَّامْ
وِبْتِمْرُق الإِيَّامْ
وْهِنِّي الْـ بِيوَعُّونَا كِلّ سِتّ سْنِينْ
ـ2ـ
لَوْ كَانُوا تَرْكُونَا
بْهَالدِّنِي.. وْنِسْيُونَا
كِنَّا صِرْنَا الْحُلْمْ.. وْنِحْنَا الْحَالْمِينْ
لَكِنْ يَا حَسْرِتْنَا
مَا بْتِكْمَلْ فَرْحِتْنَا
إِلاَّ وْبِيوَعُّونَا كِلّ سِتّ سْنِينْ
**